Katsorsaatit pitsaanerit
Meeqqanut gigtersuarmik nunatsinni eqqugaasimasunut 13-nut iisartakkatigut kapuutitigullu pitsaanerusunik katsorsaateqalersimavoq. Meeqqat angajoqqaartik ilagalugu ukiup affakkaartumik misissortittarput, tamannalu marsip ingerlanerani meeqqat ilaannut tunngatillugu Nuummi pissaaq.
-Taamatut naapittarneq angajoqqaanut oqiliallannermik misigisitsisarpoq, Narsami Zeap 6-nik ukiullip arnaa Line Lorentzen oqarpoq nangipporlu;
-Soorunami angajoqqaajulluni tupannarpoq. Ingammik paasillugu meeraq imaasiallaannaq qaangerneqarsinnaanngitsumik nappaateqalersimasoq. Meeqqanik allanik gigtertunik angajoqqaavinillu naapitsisarneq uagutsinnut pingaarutaa annertoqaaq. Pissutaalluni uku nakorsat imaasiallaannaq maanga tikinneq ajorput. Taavalu angajoqqaaqatinik oqaloqateqarnissaq qanimut pingaarutilerujussuuvoq. Soorlu Nuumiikkaangatta ukiup affakkaarlugu allaaneq ajorami nukissanik nutaanik aallertartugut. Taamaalilluta immitsinnut oqaloqatigiissinnaanerusarluta.
Nuummi meeqqat nakorsaata Britta Olsen-ip gigtersuarmik meeqqat napparsimalersimasut eqqumaffigineqarnerulersimanerarpai katsorsaariaatsinillu pitsaanerusunik nassaartoqarsimanerarlugu. Nappaat gigtersuaq pissutsimigut assigiinnginnerarpaa meeqqallu eqqugaasut inunnguutsiminni gigterisaat assigiinngittarnerarlugit, taamaattumik meeqqat ilai napparsimanerusartut ilaasa sakkukinnerusumik atortarpaat.
Meeqqat gigtiannik nakorsaq immikkut ilinniagartooq ukiumut ataasiarluni nunatsinnut tikittarpoq. Taannalu meeqqat ataasiakkaat qanoq katsorsarneqarnissaanik siunnersuisarpoq. Amma Nuup avataaniittut nappaatiminnik qanoq atugaqarnerat takujumallugit ukioq affakkaarlugu Nuuliartinneqartartut, Droning Ingrid-p Napparsimaviani meeqqat nakorsaat Britta Olsen oqarpoq. Taamatullu naapeqatigiittarneq angajoqqaanut ammalumi meeqqanik nappaateqatigiittunik naapitsitsisarneq kinguneqarluartarnerarpaa.
Meeqqat gigtersuarmik eqqugaasartut amerliartorsorinanngitsut Britta Olsen aamma oqarpoq. Meeqqat arfinillit marsip 20-aniit Nummi ukiup affakkaarluni misissortinnerat aallartissaaq.
