Katsi Kleistip kisimiilluni saqqummerseqqaataa tunisaangajalerpoq
Saqqummersitaq Katsi Kleistip inuunermini ulapileruttorfiani suliaavoq. Tarnip pissusaanik ilisimasalittut ilinniagaqarnini naammassileruttopraa aammalu ueqarlunilu meeraqarami angerlarsimaffimmi suliassaqarluartarpoq. Taamaakkaluartoq nuuteeqqamik saqqummersitsinissamik qangaaniilli takorluugaqarnermi piviusunngortinnissaanut piffissaqarsimavoq.
-Erinarsuutit inuunermut asanninnermut, ilaqutariinnut, aapparisamut, ikinngutinut, meeqqanut, inoqatinut nunagisamullu Kalaallit Nunaannut tunngassuteqarput. Erinarsuutittaaq qujassutissaqarnermut, isummakkut eqqissisimanermut, inuunerlu ilungersunarsigaangat "putumut nakkartoornermut" inuttullu nukittunerulersimalluni qaqeqqinnermut imminullu isumakkeerfiginninnermut tunngassuteqarput, Katsi Kleist oqaluttuarpoq.
Nuuteeraq erinarsuutinik kalaallisuunik qulinik imaqarpoq. Taallat erinnallu Katsip nammineerluni suliarisimavai. Katsi Kleistip kisimiilluni saqqummersitsinnginnermini ilaatigut Zedna, Pele Møller band, Ajunng, The Soul Mates aamma Karl Lynge saqqummersitseqatigisimavai.
- Saqqummersitaq inuuneq pillugu oqariartuutinik nuannersorpassuarnik imaqarpoq. Nuuteeqqamik saqqummersitsinikkut neriuutigaara nipilersorneq atorlugu inuit allat inuunerminni nukissaannik tunisinnaassallugit imminullu upperilersissinnaassallugit, Katsi Kleist nassuiaavoq.