Katillugit 705-t aappaagumut pisassiissutigineqarput

Qilalukkanik qaqortanik qernertanillu aappaagu 2012-imi pisassiissutissat Piniarnermut Naalakkersuisoqarfimmit maanna saqqummiuneqarput.
Allattoq Apollo Jeremiassen
decembarip 29-at 2011 11:14

2012-imut pisassiissutit Kitaani ukiumut pisassiiffiusumut ataatsimut qaqortat 310-ussapput qernertallu aamma 310-ussallutik.

Tunumi qilalukkat qernertat 85-it aappaagu pisarineqarsinnaapput, soorlu aamma ukioq manna taama amerlatigisut pisarineqarsinnaasimasut.

Qilalukkat qaqortat qernertallu illersorneqarnissaat aqutsivigineqarnissaallu pillugit kalaallit canadamiullu ataatsimiittartoqatigiivisa, Joint Commission on Conservation and Management of Beluga and Narwhale-p siunnersuinerat aamma atuisut ilisimasaasa ilanngunneqarnerisigut pisassiissutit amerlassusilerneqarput.

KANUKOKA-p, KNAPK-p aamma APNN-ip inassuteqaataat naapertorlugit Piniarnermut Naalakkersuisoqarfik pisassiissutinik akuersissuteqarpoq.

2011-mi decembarip 31-ata kingorna inaarutaasumik ukioq manna pisassiissutit kisinneqareerpata allannguutaasinnaasut ilanngunneqarnissaat Piniarnermut Naalakkersuisoqarfimmit maluginiaqquneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq