Katersuiniussinissamut SMS atorlugu tapiisoqarsinnaanngorpoq
Afrikamut Haitimilu nunap sajunneranik eqqugaasunut aningaasanik tunisisoqarsinnaanersoq ippassaq ilanngullugu nalorninaraluarpoq, politiinit akuersissummik Tele piumasaqaateqarmat.
Danmarkimi katersuiniarnermut DR-ip aaqqissuisuata Carl Otto Dethlefsenip katersinissaq nalunaarutigaa:
- Katersisinnaanissamut akuersissut politimesterimit uppernarsarneqarpoq, piumasaqaatillu tamaasa taamaalilluta naammassivagut, katersisinnaanngorlutalu, Carl Otto Dethlefsen KNR-imut oqarpoq.
Nunatsinninngaanniit tunisisoqarsinnaanissaanut teknikkikkut periarfissat Tele Greenlandimit isumagineqareersut taassuma aamma oqaatigaa:
- Afrikamiunut Haitimilu nunap sajunneranik eqqugaasunut katersinermut Kalaallit Nunaat peqataasinnaanngorpoq. "DI" allariarlugu 1212-imut nassiukkaanni 150 koruunit tunissutigineqarsinnaassapput. Amerlanerusunillu tunisiniaraanni 0045 70 12 50 56-imut sianernikkut taamaaliortoqarsinnaassaaq. Taamatut tunisiniaraanni Dankorti piareersimatittariaqarpoq, paasissutissat pisariaqakkat apeqqutigineqassammata, Danmarkimi katersinermut aaqqissuisoq Carl Otto Dethlefsen KNR-imut oqarpoq.
