Katersuiniarnersuaq pisussaqarfiussaqisoq
Asiami ajunaarnersuarmi eqqugaasut aningaasanik katersuunniarlugit KNR-TV toqqaannartumik unnugu arfineq-pingasuniit aallakaatitsilissaaq, piareersaatit pissusissamisut ingerlasimapput, silalu Nuummi ullumi atoruminarpallaanngikkaluartoq unnugu pisussaaloqaqaaq.
Aallakaatitassiornermut pisortaq Naja Paulsen oqarpoq sinerissamiit ilanngutassiisoqartassasoq, akitsorterussisoqassasoq, inuit ilisarisimaneqarluartut oqarasuaatikkut katersititsissapput, tamalaanik pisoqassaaq aamma nipilersortaqassaaq. Nuummi sila atoruminaappoq, Tele Greenlandillu nalunaarutigaa Nuummi silarlorujussuarnera pissutaalluni illoqarfinnut qaammataasanut attavilinnut attaveqaatit kipisaqattaarsinnaasut, Upernavimmi, Qaanaami, Tasiilami Illoqqortoormiunilu oqarasuaaatitigut nittartakkatigut attaveqarneq, radiokkut TV-kullu unnugu aallakaatitsitsineq kipisaqattaarataannaaavoq.
Oqarasuaatikkut katersineq KNR-TV- studianiit ingerlanneqassaaq, nunatsinni inuit ilisarisimaneqarluartut piumassusertik najoqqutaralugu katersititsissapput. Oqarasuarnermi normu 36 37 38 sianerfigalugu arfineqa-pingasut qeqqaniit tunisisoqarsinnaalissaaq, tunisiumasullu kikkuuneri TV-p ataatigut aallagartalerlugit nuisinneqartassapput. Tele Greenlandimi unnummut katersuiniarnermi akisussaasoq Anders Læsø radioaviisimut nassuiaavoq, inuit sianerlutik tunisiumasut akiliiffissamik nassinneqarumaartut, taannalu allakkerisarfimmi akilerneqarsinnaasoq.
KNR-ip nittartagaatigut akitsorterussinermi
akitsorterussat 42-put, taakkulu sisamararterutaat tallimanngulernerani pilerngunneqalereersimappput.
Kalaallit Rødekorsiata ilimagaa katersat nunatsinneersut katillugit 4 milliuuni unnummut angusinnaagaat.