katersuiniarneq iluatsilluarujussuartoq

Asiami ajunaarnersuarmut atatillugu Nuummi Inussivimmi ippassaq katersuiniarneq pissarsiffiulluarsimasoq katersuiniarnissamut isumassarsisoq Kim Godtfredsen kiisalu Røde korsimi aaqqissuisut oqaatigaat.

Inussivimmi aaqqissuusinermi 330.000 koruunit katersorneqarsimapput, Røde korsimiillu oqaatigineqarpoq aningaasartuutit peereerlugit 300.000 koruunit ajunaarnersuarmut ikiuutitut ingerlateqqinneqassasut. Aaqqissuisut ilimagisaminnit 100.000 koruuninik amerlanernik tunissuteqartoqarsimavoq.

Kim Godtfredsen aamma nuannaarlunilu tulluusimaaqaaq, kimmip oqaatigaa tusarnaartitsinissamik aaqqissuussinerup suliarinera ajornartorsiutitaqarsimanngitsoq, nipilersorumasorpaasuit aaqqissuusinissamullu aningaasaleerusuttut arlalippassuit nalunaartarsimapput. Assersuutigalugulu oqaatigaa nunatta timmisartortitseqatigiiffiata Air Greenlandip Københavnimiit Angu kiisalu Steffen Lynge, simimmeersoq akeqanngitsumik ilaatissinnaasimagai.

Kim Godtfredsenip nalilerpaa inuit 2500-t missaanni Inussivimmiissimassasut, namminerlu kajumissutsiminnik sulisut 50-t missaaniissimapput,

Katersuiniarnermilu isaatitat isernermi akiliutineerput, tassa isernermi kavaajaarnermiillu. Atlantic music cd-nik tuniniaanermini aamma isertitani katersuiniarnermut tunissutigisimavai, scenemullu qaqillutik tunisiumasut katillugit 150 000 koruuninik tunisisimapput.

Aqqissuussinermi nipilersortartut assigiinngitsut akunnerit sisamat sinnerlugit nipilersorsimapput, nipilersortullu Atlantic Musicimit Nuuk TV-ianiillu immiunneqarsimapput, Nuullu TV-iata immiussaq tallimanngorpat Nuummi aallakaatinniarpaa. Immiussallu tamarmik atorsinnaalluarpata cd-liaralugulu dvd-liarineqarumaarpoq.