Katersuiniarneq angusaqarfiulluarpoq

4 ½ million koruunit. Taama Asiami ajunaarnersuarmit eqqugaasunut ikiuiniarluni nunarput tamakkerlugu ippassaq unnukkut katersiuiniarnermi KNR TV-kkut ingerlanneqartumi anguneqarput. Katersuiniarlu aallartimmat ilisimatitsissutigineqarpoq aningaasat 4 million koruunit missaanniittut katersorneqareersut.

Ippassaq unnukkut katersuiniarneq ammarneqareersorlu akunnerit marluk affarlu qaangiutiinnartut aningaasat 500.000 koruunit isertinneqarput. Nunatsinni Røde Korsip siulittaasuata Åse Nygaard-ip, kalaallit taama annertutigisumik ikiuiumanerannut tupparlersimaqisup neriuutiginerarpaa, katersuiniarnersuaq sinerissami Røde Korsip amerlanerusunik immikkoortortaqalerneranik kinguneqarumaartoq.

Åse Nygaard unnersiorpoq Paamiuni Nanortalimmilu Røde Korsip immikkoortortassaanik aallartitserusuttunit saaffigineqarsimalluni.

Nunarsuup ilaani ajunaarnersuarmik eqqugaasunut nunatsinni katersuiniussisarnernit Asiami ajunaarnermik eqqugaasunut katersuiniussineq annertunerpaamik angusaqarfiuvoq. Kingullermik nunatsinni katersuiniussineq annertuumik angusaqarfiusoq pivoq 1984-imi, taamani Afrika kaannersuarmik eqqugaammat. Taamani katersat 900.000 kr.iupput.