Katersugaatit nunatsinneersut nakkutigineeruttut

Danmarkimi naalagaaffiup katersugaasivissuata inuiaat oqaluttuarisaanerannut tunngasunik katersugaasivik matuaa, sulisunillu soraarsitsiortorluni, aviisi Weekend Avisen taama allaaserisaqarpoq.

Katersugaasivissuup inuiaat oqaluttuarisaanerannut tunngasunik katersugaateqarfianiipput nunatsinneersut qangarnisarsuit tusindit arlaqartut, taakkua akornanniipput Kunuunnguup, Knud Rasmussenip issittumi ilisimasassarsiorluni angalanersuarmini katersai.

Inuiaat oqaluttuarisaanerannut tunngasunik katersugaasivik sulisuerulluinnalermat katersuugaatit nunatsinneersorpassuit nakkutigineerupput, tamannalu inuiaat oqaluttuarisaanerannut tunngasunik USA-mi katersugaasiveqarfiissuarmit Smithsonian Instituttimit assut eqqumiigineqarpoq.

- Danskit Kalaallit Nunaannut taama kiinnernerat assut eqqumiippoq, Kalaallit Nunaannimi kulturi nukittorsarniarlugu Namminersornerullutik Oqartussat siornaannannguaq annertuumik iliuuseqarput, Noel Broadbent, Smithsonian Instituttimeersoq Weekend avisimi taama issuarneqarpoq.

Danmarkimi naalagaaffiup katersugaasivissuata pisortaa Carsten U. Larsen oqarpoq inuiaat oqaluttuarisaanerannut tungasunik katersugaasiviup sipaarniarnermik eqqugaanera ajuusaarnartuusoq.

Katersugaasivissuarmi immikkoortortaqarfiit allat katersugaasivissuup aningaasatigut ajornartorsiorneranit aamma eqqugaasut, aningaasarliulernerlu ukiuni tulliuttuni ilorraap tungaanut saateqqinniarlugu maanna suliniartoqartoq Carsten U. Larsen erseqqissaavoq.