Katersugaasiviup inuusuttut maligassiuisut saqqummersilerai
16-inik ukiulik, Michelle Thårup Andersen taama isumaqarpoq. Taassuma assit ”Piginnaasatta nukkassarpaatigut”-mik taallugit Qaqortumi Katersugaasivimmi ukiaq kingulleq saqqummersippai, taakkulu inuusuttunut maligassiuisunut sammisuupput.
Assit Nuummi maanna saqqummersinneqartussanngorput, Nuutoqaq Nuuk Lokalmuseumimilu sapaatiuppamiit takuneqarsinnaalissallutik.
Inuusuttut aqqaneq-marluk maligassiuisut saqqummersitsinermi saqqummiunneqarput, taakkulu ukioqatiminnut inuiaqatigiinnullumi assigiinngitsunik oqariartuuteqarput.
Taakkua aamma tamarmik pujortartartuunngillat, aanngajaarniutinilluunniit allanik atuisuunatik kiisalu inuusuttoqatiminnut allanik oqariartuuteqarlutik.
Suliniutip Nuutoqaq Nuuk Lokalmuseumimi saqqummersinneratigut inuusuttut oqariartuutaat amerlasuunut siaruarterneqassapput, tamannalu 16-inik ukiullip, Michelle Thårup Andersenip saqqummersitsinermi pilersaarusiortup nuannaarutigaa.
Taassuma anaanani, Margrethe Thårup Andersen suleqatigalugu saqqummersitsinissamut aningaasaliissutit pissarsiara. Assit videoliallu Gerth Lyberthimit assilineqarput, taannalu aamma nammineerluni qalipakkaminik Nuutoqaq Nuuk Lokalmuseumimi sapaatiuppamiit aamma saqqummersitsissaaq.
