Katersugaasivik Allagaateqarfillu pisortartaalerpoq

Nunatta Katersugaasivia Allagaateqarfialu nutaamik pisortartaalerpoq. Ilisimatusarfimmi kultureqarnermut inuiaqatigiilerinermullu immikkoortumi pisortaq 42-nik ukiulik Daniel Thorleifsen pisortassatut naalakkersuisut toqqaqqammerpaat.

Daniel Thorleifsen Århusip Universitetianit oqaluttuarisaanermik, kalaallit oqaasiinik kulturiannillu kandidatitut naammassinikuuvoq. Aperaarput katersugaatit allagaatitoqqallu pisortaaffigilernissaanni suna angorusunneraa:

- Soorunami kulturitta oqaluttuarisaanittalu qitiusumik inissisimallutik inuiaqatigiinni nukittut inissisimalernissaat pingaartillugu oqaatigeriissuara. Aamma ullumikkut inuunitsinni katersugaatit qanganisarsuungaluartut aamma allatut soorlu nukittut isigisinnaaneri pingaaruteqarpoq. Aamma oqaluttuarisaanitsinni inunnut aamma perorsaasuusutut isigineqarsinnaavoq. Oqaluttuarisaaneq kulturilu imminut atalluinnarput, siunissamilu erseqqinnerulertariaqarsoraakka, tamannalu oqallinnitsigut anguniartariaqarpavut, Daniel Thorleifsen nassuiaavoq.

Nunatta Katersugaasiviani Allagaateqarfianilu pisortatut siulerai Emil Rosing, Claus Andreassen, Jens Rosing aamma Jens Kreutzmann. Daniel Thorleifsen apriilip maajilluunniit aallaqqaataanni sulilissaaq.