Katersugaasiviit saqqummersitsisinnaanngillat mikivallaaramik

Kalaallit Nunaanni katersugaasiviit sumiiffinni 14-ini inissisimasut saqqummersitsissagaangamik inissaaleqisatsisarput.

Ilisimatusarnikkut Kalaallit Nunaanni Misissuisitsisarnermi Ataatsimiititaliarsuarmi sulisoq, Naja Illeris, katersugaasiviit pillugit 2002-imili misissuisarsimasoq, taama paasisaqarpoq.

Paasisani nalunaarusiorsimavai, tassanilu nalunaarummi tassa atuarneqarsinnaavoq, katersugaasivinni arlalissuarni inissaq amigaatigineqartoq.

Katersugaasiviit amerlanersaat alianaalluinnaqqissaartumi kusanaqalutik nuanneqalutillu inissisimasarput, tassami illut tamakku ilaat Kalaallit Nunaat nunasiaagallarmalli sanaajupput, ineeqqalli mikisunnguit pukkitsuusarput, taamaammat saqqummersitsinissamut piukkunnartarnatik.

Katersugaasiviit ilaanni innaallagiaq teknikkikkullu atortorissaarutit aamma ajornartorsiutaasarput.

Nalunaarusiami Naja Illerisip katersugaasiviit pingasut inissaalatsinerusut pingaartumik eqqaavai. Tassa Qaanaani, Uummannami Tasiilamilu katersugaasiviit.

Taakkunani ineeqqat saqqummersitsisarfiit mikisunnguupput, ineerannguarlu saqqummersitsiffiusinnaasoq ataasiinnaavoq, kiassagaavoq saqqummersitassanillu ulikkaaveeqqalluni.

Taamaammat immikkut saqqummersitsinissamut saqqummersitanullu angalaartitassanut inissaqartitsisoqanngilaq, allaallu saqqummersitat ulluinnarni nikisinneqarpiarsinnaanatik.