Nye retningslinjer for coronavirus giver nye muligheder for at fejre nationaldag rundt om i landet. Arkivfoto.Assi: Mogensen Henning Lund

Katerinnissamut malittarisassat nutaat inuiattut ullorsiornermi atulissasut

Katerinnissamut malittarisassat nutaat kommunit sapaatiuppat inuiattut ullorsiornermi aaqqissuussinissaannut periarfissaqartitsinerussapput. Avannaata Kommuniata tamanna nuannaarutigaa, Kommune Kujalleq tunuarsimaarpoq.

Naalakkersuisut katerittoqarnissaanut malittarisassat sapaatip akunnerani matumani allanngortippaat.

Aaqqissuussinerni imminnut unammisoqanngikkuni peqataasullu sumiiffigisaminngaanneerunik inuit 100-it katerissinnaapput.

Aaqqissuussinerit silamiittussanngortinneqarunik inuit 250-it tikillugit katerissinnaapput – taamaallaat aaqqissuussinermut peqataajartortitsinissamut kaammattuuteqartoqannginnissaa piumasaqaataasoq, Naalakkersuisut nalunaarutaanni allassimavoq.

Siullermik inuit 100-init amerlanerusut katersuuteqqusaanngillat.

Nalunaarutip Avannaata Kommuniata inuiattut ullorsiornissamut pilersaarutaanut allanngueriataarpoq. Amerlanerpaartaat qarasaasiatigut aaqqissuussinerunissaat pilersaarutaagaluarpoq, maannali amerlanerusut ataatsimoorlutik ullormik nalliuttorsiutiginnissinnaapput.

- 250-inut inissinneqarmata annertunerusumik inunnullu immaqa samminerusumik aaqqissuunneqarnissaa ulloq kingulleq una suliaralugu ingerlapparput, Avannaata Kommuniani borgmesteri, Palle Jeremiassen (S) oqarpoq.

Erfalasumik amuseqatigiinneq kommunillu allaffiata silataani ataatsimut erinarsoqatigiinneq ataatsimoorluni sammisassaanerusut, ilanngullugu oqaatigaa.

AAMMA ATUARUK Kalaallit Illuutaat qarasaasiaq atorlugu inuiattut ullorsiortitsiniartoq

Nalunaarutimmi atuutilinnginnerani Ilulissani puiseqqaanniutsitsinissap taamaatiinnarnissaa pilersaarutaagaluarpoq. Sapaatiuppalli taamaaliortoqarsinnaalersoq, Palle Jeremiassen oqarpoq.

- Uanga soorlu oqalugiarnikka tassuunaannaq (Facebookikkut aaqq.) ingerlanneqassasut pilersaarutaagaluarpoq. Massakkut innuttaasut ilagalugit ingerlanneqassapput, Palle Jeremiassen oqarpoq.

Taassuma inuiattut ullorsiornissaq qilaarutigaa.

- Inuiattut ullorsiornitsinni ileqqorisarparout aamma unnukkut kalaaliminernik sassaallerluta ilaquttavullu ataatsmoorneq, taanna oqarpoq.

- Pingarutilerujussuuvoq, inuiattut ullorsiortarnerput. Ukiut tamaasa erinigisuaannarpara. Aamma inuttut uatsinnut qanilaarnerusumik ulloq taanna atuisarnerput nuannaralugu peqataaffigisarpara.

Kommune Kujalliup pilersaarutini maliinnassagaa

Kujataani inuiattut ullorsiornissamut pilersaarutit saqqummiutiaarneqarnikuupput. Aaqqissuussineq qarasaasiatigut ingerlanneqassapput, aamma naak katerittoqarnissaanut malittarisassat qasukkarneqaraluartut, Kommune Kujalliup pilersaarutini allanngortinnianngilai.

Kommune Kujallermi borgmesterip, Kiista P. Isaksenip kujataani utoqqaat sanngiinnerusullu Danmarkimit nunatsinnut angalasoqarsinnaaleqqinnerata malitsigisaanik tunillanneqaratarsinnaanerannut illersorniarpai.

- Pilersaarutit ukua ullormiit ullormut allanngortarsinnaatillugit uani uanga pingaartittorujussuunikuuara utoqqartagut sanngiinnerusortagullu paaralugit tunillaassuutsaaliivineq pingaartorujussuutissallugit, Kiista P. Isaksen oqarpoq.

Kommune Kujallermi kommunip aaqqissuussai Facebookikkut Seekon radiokkullu malinnaavigineqarsinnaapput.

AAMMA ATUARUK Kujataani inuiattut ullorsiornermi pisusssat taamaatinneqartut

Kujataanit nipilersortartut oqaluttuartullu nalunaaqutaq ataatsinut Facebookikkut Seekon radiokkullu isiginnaarneqarsinnaallutillu tusarnaarneqarsinnaassapput. Taakkulu borgmesterip qilanaarai.

- Qilanaarisorujussuullugit taakku periarfissiissutigineqartut, malillugit aaqqissuinikuugatta kikkuulluunniit sumiikkaluarunik malinnaavigisinnaasaat.

Taassuma inuiattut ullorsiornissaq qilanaaraa, tamannalu ilaqutariit katerillutik kalaaliminertuunnerannut atorneqassaaq.

- Persuarsiorlunga, kalaaliunera tulluusimaarutigersuaarlugu ulloq taanna taama misigisarpara, erinigiuaannaavippara. Ulloq taanna naleqartitannut ilaavoq, Kiista P. Isaksen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat