Nuuk Nordisk: Katarina Barrukip saamit tusarneqarsinnaatikkai
Erinarsortartoq, 28-nik ukiulik svenskeq saminit kingoqqisoq, Nuuk Nordisk Kulturfestivalimi tusarnaartitsissaaq.
- Saqqummersitara kingulleq alternative poppitut nassuiaatigineqarsinnaaneruvoq, Katarina Barruk oqarpoq.
Tusarnaariartussat Katarinap suliaani tamani pingaarutilittut qitiusumut tassa asanninneq pillugu tusarnaartitsinissamut qaaqquneqarput.
- Taannatoqaarpalussinnaasoq nalunngilara, kisianni uannut asanninneq iliuusinnut sunut tamanut qitiuvoq. Aamma asanninneq ataatsimoorfeqarnermut aamma ataqatigiinnermut tunngaviusoq isumaqarpunga.
Kulturfestivalimi ataatsimoorfeqarneq ataqatigiinnerlu aamma qulequtarineqarput.
Taassuma tusarnaartitsinermini uku neriuutigai:
- Nipilersukkannit tusarnaartut pisariaqartitaminnik misigisaqarsinnaanissaannut nukissamillu nassaarfigisinnaasaanik pilersitsinissara neriuutigaara. Tamanna iluatsissapput nuannaartorujussuussaanga.
Oqaatsini nunasiaatilinnit tigoqqinniarai
Katarina Barruk UNESCO-p oqaatsinut aarlerinartorsiortunut allattorsimaffianniittut oqaatsit tassa unesamimiut oqaasii atorlugit erinarsorpoq.
Endangered Languages Project naapertorlugu nunarsuarmi tamarmi inuit 20-nit ikinnerusut unesamimiusut oqaaseqarput.
- Oqaatsinik suli atuisinnaanera tulluusimaarutigaara. Oqaatsit atuinnarneqarnissaannik unammillerneq meeraallungali najuuffigaara, taanna oqarpoq.
Katarina Barrukip umesamimiut oqaasii atorlugit erinarsorneranut pissutaasut arlaqarput.
Siullertut ilitsoqqussaralugu oqaaserai.
Tamatuma saniatigut tamanna inuiaat saamit nunasiaateqartunit ukiorpassuarni naqisimaneqarsimasut nipeqalerseqqinnissaatut aamma tamanna isigaa.
- Oqaatsit nipilersukkanni atorsinnaaneratigut immikkut annertulernerulersitsisoqassasoraara. Tamannami arlaatigut inunnut nipangersinneqarsimasunut nipiuvoq.
Taassuma naggueqatigiit inuit unesamillu assigiissusaat maluginiarpaa. Taamaammat taassuma Kalaallit inuiaqatigiit asanninnermik tunniussaqarfigai.
- Soorunami nunap inoqqaavi naggueqatigiillu inuit eqqumiitsuliat nipilersukkallu atorlugit kulturiminnik pilersitseqqittut taperserlugillu asanninnermik nassippakka. Tamanna iliuuserineqarsinnaasut kusanarnerpaat pingaarnerpaallu ilagaat, taanna oqarpoq.
Katarina Barrukip saqqummersitaminit kingullermit Ruhttuomit erinarsukkat ilaat Katuami ullumi arfininngornermi nalunaaqutaq 20.00-21.00-ip akornanni atussavai.