Kastrupimi arsaarinnissutit amerlapput
Tipigissaatit imigassallu puiaasat 6.500 aammalu puiaasat imermik imallit tonsi ataaseq, kigutinut qaqorsaatit assigisaallu, ullormut arsaarinnissutigineqartarput.
Malittarisassat nutaat nassatanut tigummiartakkanut atuutilerneranniit ukiup affaata ingerlareernerani Københavnip mittarfissuani Kastrupimi ilaasunit arsaarinnissutit taama annertussuseqarsimapput:
Isumannaallisaanermut pisortaq Johnny Møller, atagu takoriartigit nassatat sunik imaqarnersut. Taama aperaaq; DR-p ilanngutassiortua, Narcissa Vucina, Københavnip mittarfissuani;
- Nassatat imigassanik assigiinngitsunik imaqarput; Gammel Dansk, Gin, Whisky, viinnit, tipigissaatit aammalu sodavandit Breeze imigassanik akullit, tamakkuuppullu ilaasunit arsaarinnissutigineqartartut.
Januaarimiit ilaasunit arsaarinnissutigineqarsimasut maannamut Kastrupimut nunnitsiartunit tassaasarsimapput; Tipigissaatit imigassallu 6.500 taakkua saniatigut Danmarkimiit nunanut allanut angalaniartunit 12.000-it tipigissaatit imigassallu akitsuuserneqartussaatitaasut arsaarinnissutigineqarsimapput, taakkua saniatigut puiaasat imermik imallit 1 tons arsaarinnissutigineqarsimapput. Ilaasut pisiaminnik akitsuuteqanngitsunik arsaarneqartut paatsuugallutik avaanngusuttarsimapput. Isumannaallisaanermut pisortaasup oqaatigaa, nassatanut tigummiartakkanut tunngatillugu, malittarisassat nutaat atuutsinneqalersimanerat ilaasut Kastrupimut aqqusaatiartartut eqqarsaatigalugit ilaasunut nunanit allaneersunut malittarisassat paasisitsiniutigineqartarnera oqitsuinnaanngitsoq nunarsuaq tamaat eqqarsaatigalugu qanoq annertutigisumik nassarsinnaanermik paasisitsiniaaneq annertunerusariaqarpoq.
