Saqqarmiortaartoq: Kasper quppakkut 16 meterinik nakkarmat Signep ikiorpaa

Nuliaasup, qitornaasut marluk taavalu ilaqutaasullu ikinngutasullu arlallit Signe Ravn Højgaard qutsavissaraat, ataata, uiusoq ikinngullu suli najortigigamikku. Taamaammat Redningsmedaljeselskabet aalajangerpoq Signe Ravn Højgaard nersussallugu.

Politimesterip, Bjørn Tegner Bayip, Redningmedaljeselskabip, tassa sapiitsuliorluni annaassisimasunut Danmarkimi nersorinninnartut peqatigiffiata, medalje tunniuttagaa, Ingbøl Trofæ, Ilisimatusarfimmi adjunktimut Signe Ravn-Højgaardimut tuniuppaa:

- Ajutoornermi iliuuseqarputit, siuttutut sapiitsutut imminut takutipputit, politiimesteri ilaatigut oqarpoq.

Signe Ravn Højgaard ikinngutinilu Kasper Skare ikinngutitik allat sisamat ilagalugit Kangerlussuatsiami siorna apriilip arfernani sisoraaserlutik angalaarput.

Taava Kasper Skare aputikkut tarreriataarpoq, sermip uukkartarfiata qanittuani quppakkut 16 meterinik nakkarluni ajoquseqalunilu.

Signe Ravn Højgaard quppakkut ninginneqarumavoq. Naqqinnikkami Kasper Skare imminut aalajangerpaa ilaminnillu amuarneqarlutik qaqipput, ajoqusertorlu qulimiguulimmik aaneqarluni.

Inuit sapiitsuliuissimasut kisimik Redningmedaljeselskabip Ingbølip Trofæanik tunineqartarput. Nersorneqartorlumi quarsaangasoq KNR-ip nersorinninniarfimmi naapippaa.  

- Tulluusimaaqaanga. Kisianni Kasper maaniissinnaammat peqqimmallu nuannaarutiginerpaavara, nersorneqartoq oqarpoq aannaassiniarnerullu suleqatigiissutaanera erseqqissaassutigalugu.   

Taassuma iliuusia Kasper Skaremut nalissaqanngilaq:

- Ullumi maaniissinnaaninnut Signe pisooqataavoq. Tamanna qularutiginngilluinnarpara, Kasper Skare oqarpoq.

Ajoqusersimaqisumik quppamiit qaqitsiniarneq Signe Ravn Højgaard assoruunnarsimaqaaq. tamannaannarli Kasper Skarep eqqaamasarinngilaa:

- Quppakkut ningitsikkami imminut pilliutigiinnanngilaq, aamma qummukaanneqarninni najormanga toqqissinareqaara.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl