Kasparov Moskvami tigusaavoq

Akerliussutsimik takutitsineq Ruslandimi parlamentimut sapaatip-akunnerata tulliani ingerlanneqartussap pinngilaattaani pivoq.

Inuit 3.000-it præsident Putin akerliuffiginiarlugu katersuussimapput.

Henrik Lærke DR-ip nutaarsiassaqartitsiviinit najuuttoq pisut annilaarnarnerarpai.

-Politiit takkupput, sakkutuut qamussui 15-it issimaffigalugit. Politiit sorsunnissamut piareersarluarsimapput, atisaasigut sakkuisigullu tamanna takuneqarsinnaalluni, Henrik Lærke oqaluttuarpoq.

Akerliussutsimik takutitsisut tikikkatsigit eqqissiviilliortoqalerpoq. Politiit sanileriiaarsuanngorlutik siassimapput, najuuttullu ilaat tigusariortulerlugit.

- Paasisakka naapertorlugit inuit 13-it missaanniittut tigusarineqarput, tassaallutillu præsident Putinimut illuatungiliuttut nuimasuut.

Tigusarineqartunut ilaavoq Garry Kasparov, taannalu eqqartuussisunut sassartinneqassaaq aqqusinermilu eqqissiviilliortitsisutut unnerluutigineqassalluni, taama Henrik Lærke Moskvamit tusagassiivoq.

Nutaarsiassat kingulliit malillugit Kasparov ulluni tallimani parnaarussaanissaa eqqartuussisut aalajangerpaat.