Kasparov iperagaavoq
Russeq naalakkersuisunut illua’tungiliuttoq siornatigullu skakkimut nunarsuarmi pissartaasoq Garry Kasparov parnaarussivimmiit ullumikkut iperagaavoq.
Garry Kasparov partiimi illua’tungiliuttumi Drygaya Rossiya-mi, tassa ’Ruslandi allaannerusumik’ taasinnaasatsinni siuttuusoq ullut tallimat matuma siornagut Ruslandimi aqutsineq akerliuffigalugu akerliussutsimik takutitsinermi kiisalu tigusaanermi nalaani akiuussimanini pissutigalugu tigusaavoq.
- Neriuppunga Ruslandimi illuatungiliuttutut isummaminnik siaruarteriniat qanoq pineqartarnerat nunarsuarmi inuit takujumaaraat. Naalakkersuineq navianartup tungaanut ingerlavoq kisermaassilluni naalakkersuinermut allanngoriartoratarsinnaalluni, Garry Kasparov iperagaanermini unnerluutigineqarnini pillugu taama oqarpoq.
Ruslandimi naalakkersuisuni atorfilittat Kasparov taassumalu malittai ingasattajaartutut ulorianartutut taamaallaallu ikittuinnarnit tapersersorneqartutut kiisalu Ruslandip naalakkersuinikkut isumannaatsuunissaanut qajannarsisitsiniartutut taavaat.