Qinnuteqartut katillugit 37-t illoqarfiit pingaarnersaanni kollegiamut itigartinneqarsimasut Ilinniartut Ineqarfiisa Allaffeqarfiat, KAF, ilisimatitsivoq.Assi: KNR

Karsi imaaruppoq: Ilinniartut inissaqanngitsut inissiamik attartorsinnaanngillat

Siumup, Demokraatit Atassutillu ilinniartut 37-it inissaqanngitsut Nuummi inissianik attartorsinnaanissaat siunnersuutigaat.

Amerlanerusunik kollegialiortoqassanngilaq ilinniartut inissaaleqinertik pissutigalugu ilinniarnerminnik unitsitsiinnartariaqaraluartut ilinniarnerminnilluunniit kinguartitsillutik.

Ilinniartitaanermut Naalakkersuisoqarfik taamak ersaritsigisumik nalunaaruteqarpoq. 
Inissianik attartornissamut 9,9 millioner koruunit illuartinneqarsimasut atorneqareerput ilassutitullu tapiissuteqartoqarsinnaanani. 

- Aningaasaliissutit 2022-mi atorneqareersimammata illuartinneqarsimallutilluunniit avataatigut attartornissanut amerlanerusunut isumaqatigiissuteqartoqarsinnaanngilaq, naalakkersuisoqarfimmi pisortaq Karsten Peter Jensen KNR-imut e-mailimi allappoq.

Qinnuteqartut katillugit 37-t illoqarfiit pingaarnersaanni kollegiamut itigartinneqarsimasut Ilinniartut Ineqarfiisa Allaffeqarfiat, KAF, ilisimatitsivoq.

Kollegianillu amigaateqarneq pissutigalugu ilinniartut ilinniarunnaaarallartariaqartarput.

Peqqissaanermik Ilinniarfimmi aallartinngiinnartut

Peqqissaanermik Ilinniarfimmi ilinniartut 14-it 2018-imit maannamut aallartinngiinnartarsimapput inissaqannginnertik pissutigalugu. 

Siumut, Demokraatit aamma Atassut taamaammat siunnersuuteqarput ilinniartut 37-t kollegianik attartorsinnaassasut. 37-it taakku tamarmik Nuumminngaanniinngillat – aqqaneq marluk kisimiipput, 18-it aappariiupput meerallit arfineq marlullu kisimiittuullutik meerallit. Assigiissutigaat tamarmik ilinniarnermik aallartitserusummata illoqarfiilli pingaarnersaanni inissaqaratik. 

Attartornissamulli aningaasassaqanngitsoq naalakkersuisoqarfimmi pisortap paasissutissiissutigaa.

- Kollegiami inissaqarsinnaaneq ilinniartunut neqeroorutaaviq kollegiani inissaqassappat. Inissaqanngippat ilinniartut inissianik attartugassarsiortariaqarput kollegiani inissaqalernissap tungaanut, Karsten Peter Jensen allappoq.

Matu immaqa ikersisimavoq

Naalakkersuisoqarfimmili pisortap matu ikersisimatippaa arlaat uniinnassappat naammassinngitsoorluniluunniit.

- Ukiup ingerlanerani kollegiani inissaqalersinnaavoq taakkulu periarfissaqalerpat tunniunneqarsinnaassallutik, KNR-imut allappoq. 

KNR-ip Inuit Ataqatigiit oqaaseqartartuat Agathe Fontain oqaaseqartinniarsimagaluarpaa. Tamannali pisinnaasimanngilaq. 
KNR-ip Ilinniartitaanermut Naalakkersuisoq, Peter Olsen (IA), aamma apersorniarsimagaluarpaa Nuummi kollegianik amigaateqarneq iliuuseqarfiginiarneraa paasiniarlugu.

Tamanna aamma pisinnaasimanngilaq. Angalanini pissutigalugu aggustip 15-iata kingorna aatsaat oqaaseqarsinnaalluni allappoq.
 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl