Karrat kangerluani qaqqap sisooqqissinnaanera suli aarlerinaateqartupilussuusoq

Karrat kangerluani nunaqarfiit Illorsuit Nuugaatsiallu eqqaanni qaqqap sisooqqissinnaanera suli aarlerinaateqartupilussuusoq, upalungaarsimasunit erseqqissaatigineqarpoq. Nunaqarfinnilu marlunni najugaqarsimasut nunaqarfigisaminnut utinnginnissaat suli kaammattuutigineqarpoq, mianersoqqusinermi tamanna oqaatigineqarpoq.

Nunaqarfimmi maanna matoqqasumi Nuugaatsiami kommunefogedip Mikkel Jeremiassenip Karrat Kangerluani  qaqqap sivinganerani sisoortoqarsimaneranik maluginiagaqarsimaneranik Sermitsiaq.AG-p allaaserisaqarnerata kingorna taama ilisimatitsisoqarpoq.

Aarlerinaateqarnerali suli allanngorsimanngitsoq, Nunatsinni upalungaarsimasut GEUS-illu erseqqissaatigaat.

- Qaqqap sivingarnata eqqaani (juunip 17-iani sisoorfiusup eqqaani) sumiiffinni arlalinni sisoortoqarsinnaanera suli aarlerinaateqartupilussuuvoq. Taamaammat sisooqqittoqarsimagaluarpalluunniit annertunerusumik sisooqqittoqarsinnaanera suli aarlerinaateqarpoq.

AAMMA ATUARUK Uummannami malunnartitsineq tussunngunarlunilu eqqissinarpoq

Uterlutik nuussinnaanissaat qularnartoq

Nunaqarfiit Nuugaatsiaq Illorsuillu siorna juunip 17-iani tassaarsuarmit eqqorneqarput, taakkunanilu najugaqartut nunaqarfinnut allanut illoqarfinnullu - pingaartumik Uummannamut - nuuttariaqalerput. Amerlasuullu uternissaminnik suli kissaateqarput.

Mikkel Jeremiassenillu qaqqap allannguuteqarsimaneranik takusaqarnerata kingunerisaanik neriuutaat sakkortunerulerpoq. Pinngortitammi aarlerinartoq nammineerluni peerpaa, qaqqamilu sisoortoqarujussuarnissaanut tassaarsuaqqinnissaanullu aarlerinartut taassuma qaangiussorai.

Aarlerinaateqarnerali qaangiutinngilaq. GEUS-ip qaammataasat atorlugit sumiiffik nakkutigivaa, taannalu  naapertorlugu qaqqaq allannguuteqarfiujuarsinnarpoq. Taamaammat naliliinerat naapertorlugu qaqqap sisooqqissinnaanera "suli aarlerinaateqartupilussuuvoq".

Tamannalu pissutigalugu nunaqarfiit uterfigineqarnissaat suli ilimanaateqanngikkallarpoq, Nunatsinni upalungaarsimasunit erseqqissaatigineqarpoq.

- Nunatsinni upalungaarsimasut naliliinerat naapertorlugu, maannakkut qanoq inissisimasoqarnera tunngavigalugu, innuttaasut Nuugaatsiamut Illorsuarnullu utersinnaanngikkallarput, aamma sumiiffiit navianaateqarfiusut eqqaanni angalasoqannginnissaa kaammattuutigineqarpoq.

AAMMA ATUARUK Qimagussortinneqarsimasut ajunaarnersuaqarnera puigunngilaat

2017-imi tassaarsuaqarmat nunaqarfik Nuugaatsiaq eqqugaanerpaavoq. Illorsuit kujataani-kippasissuaniipput eqqugaanginnerullutillu, qaqqamiilli sisoortoqaqqeratarsinnaanera pissutigalugu nunaqarfinni marlunni innuttaasut qimagussortinneqarput.

Nunatsinni upalungaarsimasut Danmarkiittoq GEUS suleqatigalugu qaqqat sisoortoqarfioratarsinnaasut Uummannap eqqaani Karrat Kangerluaniittoq ilanngullugu ukiumi ataatsimi immikkut nakkutigilluarpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat