Nuukkusulluni qujarussisunut Qaarsuneersut, 67-inik ukiulik Bea Petersen akuuvoq.Assi: Malik Brøns / KNR

Karranut annilaangasunut borgmesterip akissutaa: Sapaatit akunnera tulleq nuussinnaavusi

Uummannami nunaqarfinnilu innuttaasut nuukkusuttut qaqugu nuussanerlutik tusarnissaminnik qaammatini marlunngulersuni utaqqipput.

Karrat Kangerluanni tassaarsuaqarsinnaaneranit eqqugaanissaminnut ulorianartorsiortut 46-it nuukkusupput.

Angerlarsimaffitik qaqugu qimassanerlugit qaammatini marlunngulersuni tusarsiipput. Maannalu akissutissarsipput: Nunaqarfisi qimallugit Uummannami inissiiviugallartunut sapaatit akunneranni tullermi nuussinnaavusi.

Avannaata Kommuniani borgmesteri, attaviitsoq, Palle Jerimiassen oqarpoq.

AAMMA ATUARUK Karrani ulorianartoq: Nuukkusuttut suli nuunngitsut

- Sapaatit akunnera tulleq nuukkallarnissaminnut aallartissinnaalissapput, taanna oqarpoq.

Innuttaasut ima amerlatigisut nuunnissaminnut periarfissinneqassapput:

 

  • Niaqornat: 35
  • Qaarsut: 113
  • Uummannaq: 10
  • Saattut: 8
  • Ukkusissat: 3
  • Ikerasak: 7
  • Nuugaatsiaq: Najugaqartoqanngilaq
  • Illorsuit: Najugaqartoqanngilaq

Katillugit: 176

 

Paasissutissarsiffik: Naalakkersuisut

Nuunnissamik neqeroorneq pivoq, Karrat Kangerluanni qaqqaq tassaarsuartitsilluni nakkaasinnaasoq maajip aallartinnerani paasineqarpat.

Tamanna pissappat inuit 176-it angerlarsimaffii malissuarnit anguneqarsinnaapput.

Karrat Kangerluanni qaqqaq 2017-imi nakkaammat tassaarsuaqarpoq. Misissuinerillu kingulliit inerneri imaapput, maannakkut tassaarsuartut aarlerisaarutaasoq 2017-imi pisumit arfineq-marloriaat angullugu annertunerusinnaasoq.

Taamaattumik Avannaata Kommunia Namminersorlutillu oqartussat inuit 176-it qularnaatsumut nuunnissaannut neqeroorfigaat.

13-it meeraasut

Nuukkusulluni qujarussisunut Qaarsuneersut, 67-inik ukiulik Bea Petersen akuuvoq. Utaqqinermi sivisussusaa naammangisimaanngilaa.

- Ajorpoq, ajorpoq taamannak. Aarlerinarpallaaqaaq suli ikiorneqarnani, aarlerinartorsiorfimmiilluni annilaanganaqaaq, ernumarpoq. Sualummik utoqqasaanngorluni, sissallu qulinnguaniillunga ajorami,, Taanna KNR-imut ippassaq oqarpoq.

AAMMA ATUARUK Takunneqqaartoq: Kinguaakka periarfissarsiuukkusuppakka

Nuuttussat aallaqqaammut Uummannami inissiiviugallartuni najugaqassapput. Pisortat nuunnermut akiliissapput. Kingusinnerusukkullu nunaqarfinni illoqarfinniluunniit attartugassanik inissaqalerpat nuussallutik.

46-nit 13-it pigisaminnik poortuinissamut piareeqqasut 18-it inorlugit ukioqarput.

- Nuunnissamut piumasaqaataagami, aamma nammineerluni depositumimut inimullu akiliinissap qulakkeernissaa, Palle Jeremiassen oqarpoq.

Maannamut inuit 46-it Uummannami inissarigallagaat qulakkeerneqarput. Inuilli ulorianartorsiorfimmiittut sinneri 130-it nuunnissaminnik ataatsikkut qinnuteqassagaluarpata, inissiiviugallartunik kommunip nassaarsinnaanini qularaa.

- Tamarmik ataatsikkut qinnuteqassagaluarpata naammattunik peqarnerluta maannakkut oqaatigisinnaanngilara, Palle Jerimiassen oqarpoq. 

  • Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
  • 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
  • Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
  • Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.  
  • Taakkunanilu inuit 176-t illui sissamut qanittumiipput, illullu taakku amuneqarsinnaapput.
  • Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat