Karl Lyberth: Qulaatiinnarluta aalajangertoqarpoq
Danskit nunanut allanut ministeriat Villy Søvndahl naapertorlugu, kalaallit arfattassaannut arfernillu angisuunik pisassiissutissaannut tunngatillugu aaqqiissuteqartoqanngimmat, tamanna ukiup naannginnerani pissaaq.
- Qulaatiinnarlutali taamatut aalajangertoqarpoq, Karl Lyberth oqarpoq.
Danskit naalakkersuisuisa Kalaallit Nunaat qulaatiinnarlugu naalagaaffeqatigiit IWC-mi ilaasortaanerat pillugu aalajangiinerat assuarnartuuvoq, piniarnermut aalisarnermullu naalakkersuisoq isumaqarpoq.
- Siumut Socialdemokratillu 2011-mi suleqatigiinnissamik isumaqatigiissuteqarmata, naalakkersuisooqatigiinnissamullu tunngavissat Socialdemokratit SF-illu akornanni isumaqatigiinniutigineqarmata, arfanniarneq IWC-lu pillugit isumaqatigiilluinnarput. Taamaammat danskit naalakkersuisuisa arfanniarneq pillugu Kalaallit Nunaannik isumaqataajunnaarnera tupigusuutigaara, Karl Lyberth Politikenimi allappoq, taannattaaq isumaqarpoq danskit ministeriunerata nalagaaffeqatigiit pillugit 2012-imi Nunatsinni ataatsimiittoqarnerani oqaatigisani naammassinngikkai, taamanimi oqarmat - issuaaneq »Danmarkip Kalaallit Nunaat ikinngutiginerpaasaraa«.
Arfanniarsinnaatitaaneq matumani kisiat pineqanngilaq, aammali inuit nerisaannik, inooriaasiannik atugaannillu ataqqinninnissaq akuerisaqarnissarlu pineqarlutik, Karl Lyberth Politikenimi allaaserisani taama naggaserpaa.
