Karl Kristian Kruse qinigaalluarpoq
Karl Kristian Krusep Niaqornani aalisakkeriviup Royal Greenlandimit matuneqarsimasup ammaqqinneqarnissaanik qulakkeerittuusimavoq. Kruse tamatumani takutippaa isumaqatigiinniallaqqilluinnartuulluni, inerneraalumi aamma aalisakkerivik ingerlatseqatigiiffinngorneranik nmunaqarfimmiullu tamarmik aningaasatigut ingerlanneqarnissaanut tapersersuillutik.
- Taama amerlatigisunit qinerneqarsimanera nuannaarutigisupilussuuara, aamma ukiuni aggersuni sulinissannut pisussaaffiliivoq. Pingaartitakka partiip pingaartitaanut qanittuararsuupput, ineriartornerullu nunarput tamakkerlugu ingerlanneqarnissaa immikkut sulissutigerusuppara, pingaartumik nunaqarfiit mikinerusut eqqarsaatigalugit. Pingaartumik aalisarnerup iluani iliuuseqartariaqarpugut. Arctic Green Foodip akiliisinnaajunnaarnerata kingorna sumiiffinni ingerlatseqatigiiffiup tunitsiveqarfigisaani tunisisoqarsinnaajunnaarpoq. Taamaammat tamatuma piaartumik aaqqiiffigineqarnissaa pingaaruteqartupilussuuvoq, Karl Kristian Kruse knr.gl-imut oqaluttuarpoq.
Siumup Inatsisartuni arlalissuarnik ilaasortaatitaqalerneratigut Karl Kristian Krusep ataatsimiititaliani sorlerni ilaasortaaffeqalissanersoq eqqoriaruminaappoq, suliffeqarfinnilli aallartisaaneq najukkamilu ineriartortitsineq immikkut piginnaasaqarfigai.
-Inatsisiliorneq allatut ilusilerneqartariaqarpoq, innuttaasut tunisassiorfinnik namminersortunik pilersitsinissaat ajornannginnerulersillugu, aamma sinaakkutissat taakkununnga atugassarititaasut pitsaanerulersinneqartariaqarput. Nunatsinni aallartisaaniartut nammineq atukkatik misilittakkatillu aallaavigalugit najukkaminni ineriartortitsinissaannut pilersitsinissaannullu periarfissat pitsaanerulersinneqassapput, Karl Kristian Kruse nassuiaavoq.