Karl-Henrik Simonsen: Patsisiliunneqartut akueriuminaapput

Politiit nunatsinni nunaqavissut aqutsinermik nunatsinni ilinniaqqissimasut politiinspektørinngorsinnaanngillat, naak ilinniarnermik nalaani oqarfigineqarsimagaluarlutik, ilinniarneq politiinspektørinngornissamut piginnaalersitsisinnaasoq.

Nunatta vicepolitiinspektøriata Karl-Henrik Simonsenip tamanna uggoraa, patsisiunneqartullu akueriuminaatsillugit:

- Soorunami isumaqatiginngilara, aamma eqqortutut isiginngilara. 1996-imiit 1999-imi naammassinissatta tungaanut pikkorissartuarsimavugut, tamatumalu kingorna pikkorissartarsimalluta. Taama nalilerneqarnera uggornarpoq, akueriuminaallunilu. Kisianni taama nalilerneqarsimappat toqqammavigisariaqarparput, patsisiunneqartulli akueriuminaatsippakka, Karl-Henrik Simonsen oqarpoq.

Danmarkimi ilinniariartoqqittariaqarnissamut tunngavilersuutigineqartut Karl-Henrik Simonsenip eqqoriaruminaatsinneqarpai, ilinniartitsinerulli tassanngaannartumik allanngortinneqarnera ippinnartinneqarpoq:

- Aqutsinermik ineriartornerup sukkasuujusimanera oqariartuutaasimavoq, kisianni piffissami kingullermi pikkorissartarnitsinni takusinnaavarput pikkorissarnerit imaat taamaaginnartut. Pereernikuusavut uteqqittarpavut, kisianni uggornarpoq taama ilinniartitseriarluni tassanngaannaq allanngortitsineq.

Karl-Henrik Simonsen sulinngiffeqarallarnissamik qinnuteqaateqarsimavoq, nutaamillu misileerusunnini pissutigalugu taama qinnuteqaateqarsimalluni:

- Ukiorpassuit atorfeqarsimalluni assigiinngitsunillu suliniuteqartarsimalluni suliffik tassanngaannaq qimattariaqalerlugu eqqarsarnanngitsuunngilaq, eqqarsartaatsinnili tunngavigisarpara: Arlaannik nutaamik misiliiguma ajoqutaanavianngilaq, qaffassaatitut atuinnassavara, imaassinnaavoq suliffittaara ima nuannaritigileriga tassaniiginnarlunga, soorunami piumassappannga, Karl-Henrik Simonsen oqarpoq.

Taanna aqutsinermik 1996-imiit 1999-ip tungaanut nunatsinni ilinniarsimavoq.