Karen Littauer politimestereqarfimmit nalilersorneqareerpoq
Karen Littauerip Qaanaallu kommuneani inunnik isumaginninnermut pisortap politiinut unnerluutigineqarnerat Politimestereqarfimmit nalilersorneqareerpoq, Politimesterilu Steen Thomsen oqarpoq, pinerluttaalititsinermut inatsisip unioqqutinneqarsimanissaa pillugu misissuinissamik suliaq aallartinneqassasoq, tassa unnerluutiginninnerup kingorna suliamut attuumassuteqartunik killisiuinerit misissuinerillu aallartinneqassapput.
Karen Littauer taassumalu saniatigut Qaanaap kommuneani inunnik isumaginninnermut pisortaq Qaanaami angajoqqaaqatigiinnit politiinut unnerluutigineqarput, unnerluutiginninnermullu tunngaviusut arlaqarput, ilaatigut meeqqanik angajoqqaajusunillu kiisalu inunnik ataasiakkaanik ataqqinassusiiaanikkut narrunarsaasimanerit tunngavigineqarlutik.
Unnerluutiginninnermut aamma angajoqqaat akuersiteqqaarnagit, meeqqat inuusuttuaqqallu ineeqqamut iserteriarlugit videoliuummullu immiussilluni killisiorneqartarsimaneri tunngavigineqarput.
Politiinut unnerluutiginninnermut tunngavigineqarportaaq, Karen Littauerip tarnip pissussaanik immikkut ilinniagaqarsimasunik siunnersorteqanngivilluni ikiorteqanngivillunilu killisiuisarsimanera, meeqqanut inuusuttuaqqanullu tarnikkut kingunerluuteqarsimanera.
Karen Littaueri Danmarkimi killisiorneqassanersoq aammalu videoliai uppernarsaatissatut arsaarinnissutigineqassanersut apeqqutigigatsigu tassunga tunngasunik Politimesteri Poul Thomsen oqaaseqarsinnaannginnerarpoq.
Karen Littauerimik Qaanaamilu inunnik isumaginninnermut pisortamik politiit qanoq sivisutigisumik suliaqarnissaat oqaatigissallugu aamma siusippallaartoq Steen Thomsen oqarpoq.
