Karen Littauer Orto Ignatiussenilu nersornaaserneqartut

aggustip 25-at 2006 09:32

Meeqqanut suliniuteqarneq pillugu 2006-mi nersornaat Orto Ignatiussen-imut Karen Littauerimullu tunniunneqarpoq. Nersornaasiineq Nordisk Børneforsorg-ip Falkonercenterimi Frederiksbergimiittumi ullap tungaani ingerlanneqarpoq.

Karen Littauer filmiliornermi ilitsersuisartoq Orto Ignatiussen-ilu isiginnaartitsinermi ilitsersuisartoq, ukiuni arlaqalersuni meeqqanut inuusuttuaqqanullu ajornartorsiutilinnut nutaaliortunik meeqqanullu ineriartortitsisunik annertuumik suliaqartarsimapput. Tamatigut nunatsinni, aammali Gentofte-mi meeqqanut qimaanikunut suliaqarnikuupput.

Karen Littauer Orto Ignatiussenilu namminersorlutik aningaasanillu taperneqaratik suliaqartarnerat pillugu nersornaaserneqarput. Meeqqat periarfissaqarpianngitsut amerlasuut ikiortarpaat, ikioruminaaffiusunilu ikiuisarlutik.

Børneforsorgens Fællesråd 1991-mili nersornaasiisalerpoq.

Nersornaaserneqartut 10.000 koruunimik akissarsitinneqarnermi saniatigut aamma qiperukkamik tunisissapput.