Karen Littauer isumaginninnermullu pisortaq unnerluutigineqarput

Karen Littauer aamma Qaanaami inunnik isumaginninnermut pisortaq Louise Qaavigaq Qaanaami angajoqqaaqatigiinnit politiinut unnerluutigineqarput. Unnerluutiginninnertik Qaanaami angajoqqaatigiit sinnerlugit oqaaseqartup Storm Odaap ima tunngavilersorpaa:

- Tassa tunnniussinitsinnut tunngavigaarput, meeqqatta filmiliarineqarnissaanik, uagut angajoqqaajusugut akuersissummik tuninikuunngilarput. Isiginnaartitsinermut meeqqanut tamaannga sungiusaajartorluni, suliami saniatigut meeqqatsinnik taama filmiliarinninnissaa ilisimasimanngilarput. Nalilerparput unioqqutitsisutut, akuersissummik aamma tunineqarnikuunnginnami.

Angajoqqaaqatigiit isumaqarput meeqqat pisinnaatitaaffiat unioqqutinneqarsimasoq.

- Imatut aamma pisoqartarsimagami, filmiliarineqarneranni akissutissaaleqileraangata filimiliuut unitseriarlugu, imatut oqarfigisarsimagamigit :” Aamma imatut oqarsinnaavusi: Angajoqqaamma imigassartorunnaarnissaat kissaatigaara”. Taava filmi aallarteqqittarlugu taamatut oqaasissioriarlugit, oqarnerat filmiliariniarlugu.

Storm Odaq nangippoq:

- Taanna Karen Littauerip tusagassiuutinut oqaaserisaa – meeqqat oqarnikuusut – angajoqqaatik imigassartoqqujunnaarlugit – Karen Littauerimuna nammineerluni oqartittarsimagai.

Storm Odaq aperaarput Karen Littauerip meeqqat filmiliarinialeraangamigit sutittarsimanerai.

- Tassa ullaaq oqaatigineqartoq ilumoorpoq, tassa kikkut angajoqqaavi ippassaammat putoqqanersut kikkullu angajoqqaavi ulloq taanna putoqqassanersut paasiniarlugu, meeqqat pinngitsooratik nappaaqquneqartarsimapput oqarfigineqarlutillu: ”Pinngitsoorasi nappaassaasi”.

Karen Littauerip meeqqanut iliuuserisimasai meeqqanut kinguneqarsimapput.

- Tassa assigiinngitsutigut apersoraluaraanni, soorlu unnukkut angerlaraangamik qasoqqasorujussuusaramik. Taava aperalugit, suisi? Sulerivisi? Akisarput:” Naamik oqaqqusaanngilagut”. Taanna amerlanerpaat atornikuugamikku- tassa piumaffigineqarsimagamik oqassanngitsut.

Meeqqat pissusilersornerannut pisoq aamma kinguneqarsimasoq Storm Odaq oqarpoq.

- Ilumut taamaappoq, Karen Littauerip tikinnginnerani maani inuiaqatigiinnguusugut atugarisarput; meerartagut assigiinngitsunik oqaloqatigisinnaasarpagut, kisianni isiginnaartitsinermut sungiusarnerup ingerlanerani allanngoriartuaarnerminni matoqqasunngorput oqartarlutik, pinngitsooratagooq inortuissanngilagut, taava aamma pinngitsoorata takkutissuugut.

Karen Littauerimik unnerluutiginninnermut ilutigitillugu Qaanaami inunnik isumaginninnermut pisortaq Louise Qaavigaq tatigineqarunnaarluni, nipangersimasussaatitaanerminik unioqqutitsisimasutut politiinut aamma unnerluutigineqarpoq.

Angajoqqaaqaatigiit allapput Karen Littauerip pikkorissaanermi nalaani

meeqqat nappaasinneqartarsimagai, nappaasullu ineeqqamukaallugit inunnik isumaginninnermi pisortaq aggersillugu nutserisulerlutik killisiorneqartarsimasut.