Karen Jespersen nunatsinnut tikeraarusuppoq
Isumaginninnermut ministeri taamatut qisuariaateqarpoq Meeqqat Inuusuttullu pillugit Ilisimasaqarfik nutaamik Kalaallit Nunaanni meeqqat piitsut pillugit nalunaarusioreersorlu.
- Meeqqat pisariaqartitaminnik amigaateqarput soorlu; nerisassaqarniarnikkut inissaqarniarnikkullu. Ukiorpassuarni meeqqat atugarliuuteqartareerput, tamannalu pillugu maannakkut taamatut qisuariaateqarpunga. Karen Jesperseni Kalaallit Nunaannut tikeraarusuppoq, ajornartorsiutillu qanimut takorusullugit.
- Kalaallit Nunaaliarusulerpunga, Namminersornerullutik Oqartussat qullersaqarfii kisiisa oqaloqatigiartornianngilakka nunaqarfiit aamma ornikkusuppakka, suliniaqatigiiffiit peqatigiiffiillu aamma oqaloqatigerusuppakka, Karen Jespersen, oqarpoq.
Ritzauip paasissutissiinera malillugu Karen Jespersen ikiuinissaminut piareersimavoq.
- Suut tamarmik misilinneqartariaqarput. Piareersimavunga isumassarsianik ikiuunnissamut kalaallit nammineq piumappata. Sianigisariaqarpormi allat isumaannik nanertuinnginnissaq. Karen Jespersen, taama naggasiivoq.