Karen Jespersen: Borgmesteri, kalaallit immikkoortitaanerannit ikiukkit!
Taanna Århusip borgmesterianut Nicolai Wammen-imut allagaqarpoq, piumasaralugulu kommune nalunaarusiussasoq kalaallit ilaqutariit qulit muslimit inuusuttaanniit uumisaarneqartarnertik annersarneqartarnertillu tunngavigalugu Gellerup Parkenimiit sooq nuuttariaqarsimanersut, taama aviisi Jyllands-Posten allaaserinnippoq. Atugarissaarnissaq pillugu ministerip Karen Jespersenip kalaallit musliminiit uumisaarneqarlutillu annersarneqartarsimanerat akuerineqarsinnaanngitsutut aammalu muslimit assigiinngisitsiniarnerattut isigaa.
Ukioq kingulleq Århusip kommuneata, politiivisa aammalu inissiani peqatigiiffiit kalaallit ilaqutariit qulit Gellerup-imi musliminit uumisaarneqartarnertik pissutigalugu nuulermata ikiortariaqarsimavaat, kalaallillu taama nuuttariaqarsimanerat Danmarkimi atugarissaarnissaq pillugu ministerip akuersaarsinnaanngilluinnarnerarpaa.
Århusip borgmesteriatali Nicolai Wammenip erseqqissaatigaa, suliaq tamanna ukioq ataaseq sinnerlugu pisoqaassuseqartoq, taamalu tamatuma kingorna kalaallit Gellerup Parkenimi ajornartorsiortitaanerannik tusagaqaqqissimanatik.
- Ilaqutariit qulit taakku Gellerup-imiit nuunnissartik namminneerlutik qinigaraat, isumaqarpugullu tassuunakkut ikiorserneqartut, Århusip borgmesteria oqarpoq.
