KAPP: Kangaatsiami imeerunnissaq ernumanarpoq
- Silap nillernera pissutigalugu qerinnarsereermat piaartumillu qanoq iliuuseqartoqanngippat, imeqarnerlu pinngitsoorneqarsinnaanngitsoq ukiup sinneranut qularnarunnaarsinneqanngippat, nunaqqatigiinnut pitsaanngitsumik kinguneqartussanngussaaq, peqatigiiffiup siulittaasua, Nikolaj Steenholdt allappoq.
Taseq imeqartitsisoq nungungajalersoq, ukiuuneranilu qeriguni Kangaatsiaq imermik kuuginnartoqarunnaarnissaa ernumassutigalugu Nikolaj Steenholdt nassuiaavoq.
Illoqarfiup imeqaannarnissaa anguniarlugu oqartussanit qanoq suliniuteqartoqarnersoq innuttaasut erseqqissumik paasitinneqarnissaat Steenholdtip aamma ujartorpaa.
- Innuttaasunit amigaatigineqarpoq, toqqissisimanartinneqarnanilu, taanna oqarpoq.
Kuuginnartumik imeeruppat illoqarfimmi tunisassiorfik matugallartariaqassasoq ernumassutigalugu Nikolaj Steenhold aamma oqarpoq.
