Kapisillit tunisassiat nitritimik akoqarnersut misissulerpaat

Royal Greenlandip qulakkeerusuppaa, kapisillit tunisassiatik avammut ingerlateqqitsinnagit ilumut nitritimik akoqannginnersut.
Allattoq Najaaraq Egede
maajip 06-at 2010 12:57

Kapisillit pujuukkat nerpii aappillersaammik kræfteqalissutaasinnaasumik nitritimik akoorneqartarsimanerat aalisakkanik tunisassiorfiit marluk akiliisitaarujussuarnerannik kinguneqartoq Royal Greenlandip iliuuseqarnialerneranut tunngaviuvoq.

Suliffeqarfissuit marluk tassaasut Kalaallit Nunaanni angerlarsimaffeqartup Polar Seafoodip Danmarkimi immikkoortortaa, pujuukkanik tunisassiorfik, Polar Salmon, 80.000 koruuninik akiliisinneqarsimavoq, allalu Vega Salmon Esbjergimiittoq 1 million koruuninik akiliisinneqarluni.

Royal Greenlandip erseqqissaatigaa namminneq tunisassiaatiminni nitratimik atuinnginnissaq piumasaqaataareersoq, taamaattorli tunisassiaatitik kingulliit suli tunineqanngitsut nitratimik akoqannginnersut misissoqqissaarniarlugit.

Royal Greenland tunisassianik Vega Salmonimeersunik siornatigut tunisassiaqalaarsimasoq aamma ilisimatitsissutigineqarpoq.

Royal Greenlandip kapisillit Dansalmon Hirtshalsimi maanna pujoortittakkatik nitritimik akoqannginnerarpaat.

- Suleqatigisartakkatta nitrit 100 procentimik atunngilaa, attaveqarnermut siunnersorti Siverth Amondsen ilisimatitsivoq.

Kapisillit pujuukkat nitritimik akoqarnerat paasineqaqqaarpoq, Inuussutissaqarnermut Aqutsisoqarfik qaammatit pingasut matuma siornagut misissuitilluni suliffeqarfiup KB Finestip tunisassiai akuutissatut atoqqusaanngitsumik nitritimik akuugaasut paasimmagit.