Kapisillit nungulersorisat amerlangaarmata tupigusuutigaat
Indianerit oqaluttuatoqaataat kuuit tatsillu aappaluartuinnanngorumaarnerannik siulittuisoq maanna piviusunngorpoq.
Indianerit aalisarnermillu inuussutissarsiuteqartut siorna ernumatsassimaarput: Kapisillit 10 millionit missinginik amerlassusillit Britisk Columbiami kuussuarnut Fraserimut aamma Adams-imut ukiut tamaasa takkusimaartaraluarput. Siornali kuussuarni taakkunani kapisillit millionit ataasiinnaat takkusimaarput. Taama ikinnerutiginerannut avatangiisinik mingutsitsineq aalisapilunnerlu ingerlaannartumik pisuutinneqarput. Taama pisoqarnera aningaasarsiornikkut pinngortitallu pissuseqatigiinneranut ajunaarnersuartut isigineqarmat, misissuiffigineqalerpoq, sulilu misissuiffigineqarluni.
Ukiormannali paasiuminaatsumik tamanna allanngoriataarpoq. Maannakkummi kapisillit 34 millioniunerarneqarput... aap, 34 millionit. Kuussuit kapiliseqangaarmata aappaluartuinnaapput, takornariat ilisimatusartullu Canadami sumit tamaneersut Amerikallu naalagaffippassuinit takkussuupput, tupigusullutik namminneq uppernarsillugu kapisilippassuit takorusullugit. Ilisimatuut kapisillit nungulersoralugit ernumanikuugaluarmata, kapisilippassuit taakku ilisimatuunik illaruaatiginnittut aviisimi National Post-imi allaaaserinnittoqarpoq.
Ullut ilaanni kuuit tatsillu aappaluartuinnanngorumaartut indianerit oqaluttuatoqaanni ilaavoq, tamannalu maanna piviusunngorpoq.
Canadami ilanngutassiortutta Marianne Stenbækip taama tusagassaqartippaatigut.
