Kapisillit genimikkut allanngortitikkat Canadami tuniniarneqarsinnaanngortut
Aalisakkat pineqartut Amerikami uumassulinnut atortussiornermi suliffeqarfimmit, AquaBounty Technologiesimit ineriartortinneqarput.
Aviisi The Gazette naapertorlugu, suliffeqarfiup geni atugaa kapisilimmit Chinookimit, Canadap Manerassuarmut sineriaani anginersaasumeersuuvoq.
Genilu taanna kapisilimmut atlantikup imartaaneersumut sukkanerusumik alliartortitsisarpoq nalinginnaasumiillu angilerulersitsilluni.
Kapisillip taama allanngortinneqarnera peqqissutsimut navianaateqanngitsoq, ministereqarfiup oqaatigaa.
Ukiorli ataatsip missaa qaangiuppat aatsaat pisiniarfinni tunisaalissaaq.
Avatangiisinilli atuisartunillu illersuisut arlallit maanna akuersissummik tunniussisoqarsimaneranut akerliupput.