Kapisillit aatsitassarsiorfinnit ulorianartorsiortinneqartut

British Columbiami indianerit høvdingiata mingutsitsisoqarsimanerata kingorna kapisillit ulorianartorsiortinneqarsinnaanerat, taamaalillunilu indianerit inuunerannik aningaasarsiornerannillu kingunerlutsitsisinnaanera, ernummatigaa.

Sapusiaq sequmissimavoq
Kuultisiorfiup kanngussanillu aatsitassarsiorfiup Mount Polleyp imerpalasunik eqqaavianit sapusiaq sequmissimavoq. Imeq atornikoq minguttoq toqunartortalik, tailingsinillu taaneqartartut, aatsitassarsiorfimmit eqqagassat ulorianartut, aatsitassarsiorfiup eqqaani kuunni maanna kuugunneqarlutik siaruariartorput, kuummullu Fraser Riverimut, British Columbiami kapisileqarfiit pingaarnersaanut, maanna ingerlaarlutik.

Sapusiap sequminneranit kuugussaasut annertupput. Aviisi Globe and Mail naapertorlugu aatsitassarsiorfimmit eqqagassat imerpalasut OL-imi unamminerni naluttarfiit 2000-it ulikkaarsinnaavaat. Nunamullu annertuumut siaruaapput, tamaani inuit imeqarfii mingutsinneqarlutik.

Mianersoqqutit tusaaniarneqarsimanngillat
Mingutsitsinerullu kapisillit 1.5 millionit Fraser Riverikkut majortut ulorianartorsiortippai.

Indianerit høvdingii, aatsitassarsiornermut akerlioreersut, pinngortitami pissuseqatigiinnermut kulturimullu ajorluinnartumik kinguneqassasoq tusagassiutinut nalunaarutigaat. Canadamilu naalakkersuisut, naalakkersuisut namminneq ilisimatuuannit indianerinniillu, mianersoqqussutinut ukiuni kingullerni saqqummiunneqartartunut tusaaniarnerusimasuuppata ajutoornersuaq pinngitsoorneqarsimasinnaagaluartoq oqaatigaat.

Maannalu kingusinaareerput, kapisillimmi majulereerput, kuuit misissorneqaqattaarput ajutoorneq qanoq kinguneqassanersoq misissorneqarniarluni.