Kapisilinnut aqquserniornerup takornariat amerlisissavai

Kommuneqarfik Sermersuumi borgmesterip Asii Chemnitz Narupip piumasaa pissappat Nuuk nunaqarfillu Kapisillit ataqatilissapput.

Borgmesteri naapertorlugu siunnersuutip nunaqarfeeqqamut takornariat amerlisissavai.

- Nuumminngaanniit Kapisilinnut pisunnermi taava Kapisilinnut apuunnermi aamma unnuinissamut periarfissat Kapisillit eqqaani aamma takornarianut misigisassarsiorfissat arlaqangaatsiarmata taamaalilluni aamma Kapisilinni takornariaqarnikkut ineriartortitseqqinnissamut ilapittuutaassalluni. Asii Chemnitz Narup taama oqarpoq.

Illoqarfiit pingaarnersaanniit nunaqarfik qaninnerpaaq 75 kilometerinik ungasissuseqarpoq, siunnersuullu naapertorlugu assakaasullit nunaannakkoorutit ingerlaffigisinnaasaatut silitsisumik aqquserngiortoqassaaq. 

Pinngortitaq kikkunnit tamanit orninneqarsinnaasoq 

Borgmesterilu naapertorlugu angalanissamut pitsanngorsaatit pitsorluttut innarluutillillu nunap timaanut angalasinnaanngorsissavai.

- Taakku allatuulli periarfissarissaarnerusariaqarput aamma pinngortitamut alianaarsaariartornissamut aammalu pinngortitamiinnermi misigisassat taakkua nuannersut nukittuallannartut aamma taakkununnga periarfissiissutiginissai pikkoriffiginerulertariaqaripput isumaqarpunga. Asii Chemnitz Narup taama oqarpoq.

Taassuma piumasaa pissappat, Nuup Kapisillillu akornani aqqutaani takornarianut pinngortitamik takunnikkusuttunut illuaqqiortoqassaaq.  

Takornariat amerlisissinnaavai

Siunnersuullu ilisimanngikkaluarlugu Visit Greenlandimit nunaqarfimmut assakaasullit nunaannakkoorutit ingerlavisinnaasaannik aqquserniornissaq takornariartitsinermut siunnersuisoqatigiinni pisortap torrallataalluarsinnaanerarpaa.

- Tusaannarlugu isuma pitsaasuuvoq. Assakaasullit nunaannakkoorutit ingerlavissaanik aqquserniortoqarpat, aqqut taanna inunnut amrlanerusunut atoruminarnerulissaaq. Aqqut nukkassarsimarpiarani qasujaallisarsimarpiaraniluunnit atorneqarsinnaasoq. Anders Stenbakken taama oqarpoq.

Kapisilinnut aqquserniortoqarnissaanik siunnersuummut 1 millioni koruunit immikkoortinneqassasut, amerlanerussuteqartut, IA-meersut Demokraatineersullu ullumi aalajangiuppaat. 

Siunnersuut Siumumiit taperserneqaraluarpoq aningaasalli atorneqartussat maannakkuutillugu amerlavallaartut isumaqarlutik. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat