Kapisilinnik aalisaqqittalernissaq KNAPK-p piumasaraa
Taama piumasaqaateqarnerminut siulittaasup Leif Fontainep tunngavilersuutigaa, Atlantikup Avannaata kapisiliata Nunatta Kitaata sineriaani amerliartoqqilersimanera, aamma ukioq kaajallallugu tamaaniittarluni, aalisakkanillu allanik aalisarnermi akulikinnerusumik pisarisoorneqartalerluni.
KNAPK-p siulittaasuata ilutigalugu aamma tikkuarpaa, inuussutissarsiutigalugu kapisilinniartarneq kalaallit savalimmiormiullu namminneq piumassutsiminnik ukiut 20-t kingulliit unitsissimammassuk. Illuatungaanili Norgemi, Skotlandimi, Irlandimi Canadamilu aalisartut namminneq imartaminni kapisilinniarsinnaanerat NASCO-mit akuerineqarsimavoq.
- Tamanna tunngaviusumik pissusissamisuunngilluinnarpoq, aamma kalaallinit aalisartunit akuerineqaqqissinnaanani, Leif Fontaine oqalugiarnermini ilaatigut oqarpoq.
Kalaallit Nunaata ukioq-mannamiit pisassinneqarnissaa taamaalilluni piumasaraa.
- Ilaasortatta ilungersorlutik suut tamaasa atorlugit kapisileqatigiit amerliartoqqinnissaat iliuuseqarfigereerpaat. Pisassinneqanngikkutta KNAPK-p siunnersuutigissavaa, Kalaallit Nunaata Atlantikup Avannaata Kitaani Aalisarneq Pillugu Suleqatigiiffimmit ilaasortaajunnaarnissaa Namminersorlutik Oqartussat isumagissagaat, KNAPK-p siulittaasua erseqqissaavoq.