Kapisilinniarneq unittussanngorpoq
Unnuaru unnuap qeqqata kingorna kapisilinniarneq inerteqqutaalissaaq, taamaattumik unnuaru oktobarip 31-anni unnuap qeqqarpat qassutit tamarmik qaqinneqareersimassapput.
Tamatumunnga tunngaviuvoq, Naalakkersuisut, KNAPK isumasioreerlugu aalajangersarnikuummassuk, 2009-mi kapisilinniarneq oktobarip naanerani unitsinneqassasoq. Tamannalu sunngiffimminni inuussutissarsiutigalugulu kapisilinniartartunut tamanut atuuppoq.
Taamalilluni qassutit kapisilinniutit unnugu unnuap qeqqartinnagu qaqinnissaat eqqaamaneqartariaqarpoq - matumanilu eqqaamaneqassaaq kapisilittat tamarmik Kalaallit Nunaanni Aalisarsinnaanermut Akuersissutinik Nakkutilliisoqarfimmut, nalunaarutigineqartussaammata. Kapisilittanik nalunaaruteqarnermi immersuiffissaq kommunimi imaluunniit nittartakkami www.nanoq.gl -imi pineqarsinnaavoq.