Kapisilinniarneq uningajalersoq
Pisarineqarsimasut KANUAANA-mut nalunaarsorneqartut aallaavigalugit ukioq manna 19,5 tonsit ukiumoortumik pingasunngornermi nunguttussatut naatsorsuutigineqarpoq. Taamaattumik ulloq taanna naggataamik kapisilinniarfiusinnaavoq. Tassa kapisilinnut qassutit ulloq taanna kingusinnerpaamik nal. 24.00 qaqinneqareersimapput.
Aalisarnermut piniarnermullu naalakkersuisoqarfik taama nalunaaruteqarpoq.
Eqqaamallugu pisatit pisarineraniit piaarnerpaamik nalunaarutigissagakkit - tamanna inuussutissarsiutigalugu sunngiffimmilu aalisartunut atuuppoq. Pisaqanngikkaluaraanniluunniit nalunaarutiginnittoqartussaavoq.
AAMMA ATUARUK Kapisilittassiissutit suli tamakkerneqanngitsut
Inuussutissarsiutigalugu sunngiffimmiluunniit aalisartut nalunaaruteqarsimanngitsut kapisilinniarfissanngoqqippat akuersissutinik tunineqarsinnaanngillat.
2019-imi kapisilinnik aalisarnerit nalunaarutigisimanngikkukku KANUAANA-mut nalunaarutigisinnaavat. Nalunaaruteqarnissamut immersuiffissaq www.sullissivik.gl nassaarineqarsinnaavoq.