Kapisilinniarneq ammaanneqaqqissaaq

Nunatsinni inuussutissarsiutigalugu kapisilinniarnerup ammaateqqinneqarnissaa Aalisarnermut, Piniarnermut Nunalerinermullu Naalakkersuisup, Ane Hansenip, paragraf 37 naapertorlugu apeqquteqaammut aammaarluni akissuteqarfigaa.
Allattoq Carla Davidsen
juulip 15-at 2011 13:46

Knud Fleischerilli, Kattusseqatigiinneersup, apeqquteqaataanut Ane Hansenip erseqqissaatigaa, biologit misissuisimaneri, tassungalu tunngatillugu inassuteqaataat aallaavigalugit, tamanna aatsaat pisinnaasoq. Taamaammat ukioq-manna pisinnaanngilaq.

- Tamatumunnga pissutaanerpaavoq, kapisillit Kalaallit Nunaanni massakkut pisarineqartartut amerlanersaat tassaammata mixed stockinik taaneqartartut. Tassalu kapisillit nunanit allanit aallaaveqartuunerat. Amerikami Avannarlermi Europamilu kuuit kapisillit suffifigisartagaasa ilaat aalisapiluffigineqarnermikkut mingutsinneqarnermikkullu navianartorsiortinneqarmata, Ane Hansen nassuiaavoq.

Taamaattumik Kalaallit Nunaat Atlantikup Avannaani kapisillit Piujuartinneqarnissaat pillugu Suleqatigiiffik, NASCO, aqqutigalugu inuussutissarsiutigalugu kapisilinniannginnissaminut 2011-mi pisussaaffilerneqarsimavoq.

Naalakkersuisulli isumaqarput inuussutissarsiutigalugu aalisarsinnaanerup aappaagumu 2012-imiit ammaanneqarnissaa sulissutigineqartariaqartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq