Kapisilinni meeqqat illuat nutaaq
Aningaasarpassuit aningaasaliissutigineqartut aningaasaateqarfimmit 15.juni Fondenimit aamma ANT-Fondenimit tapiissutigineqarput. 15.juni Fonden 2,5 millionit koruuninik tapiissuteqarpoq, ANT-Fonden 500.000 koruuninik tapiissuteqarluni.
Illu Kapisilinni meeqqanut inuusuttunullu pingasunit 17-inut ukiulinnut Mælkebøttenimi najugaqarfimmiluunniit Ilasiami inissinneqarallartunut atorneqartassaaq. Meeqqanut inuusuttullu avatangiisinut allanut nuukkallartarnissaannik pisariaqartitsisunut atorneqassaaq.
Mælkebøttenimi pisortap, Kirsten Ørgaardip, tapiissutigineqartut nuannaarutigai:
- Aningaasaliissutigineqartut nuanaarutigisorujussuuavut, Kapisilinnilu illuuteqalernissatsinnik qangali kissaatigisatsinnik piviusunngortitsinnaanngorput.
Meeqqat amerlanertigut tassaapput inersimasunut attaveqarpianngitsut, imminnut paarisut, meeqqanillu allanik imminermissut atugalinnik maaniinnaq aneeqateqartartut, Kirsten Ørgaard oqarpoq
Aningaasaateqarfiup 15. juni Fondenip siulersuisuini siulittaasup, Hans-Jørgen Rasmussenip, Kalaallit Nunaanni pinngortitap aamma suliamut ilisimasat atorlugit meeqqanik inuusuttunillu pisariaqartitsisunik ikiuiniarluni sullissiniarnermi ikiuussinnaanertik aamma nuannaarutigaa.
Kapisilinni illu sannaeqartussaq 168 kvadratmeterisut angitigissaaq, meeqqanut inuusuttunullu arfineq-pingasunut inersimasunullu marlunut inissaqassalluni. Illu sanaartorlugu aallartinneqareerpoq, atoqqaartinneqarnissaalu aappaagu 2014-imi juunimi naatsorsuutigineqarluni.