Kapisilinni atuarfik sumut atorneqassanersoq innuttaasunit tusarniaassutigineqarpoq
Kapisilinni atuarfik 2000-mi 24-t missaannik atuartoqarsimagaluartoq ukioq manna pingasuinnarnik atuartoqalertussaammat matugallarneqartariaqartutut Nuummi kommunalbestyrelsimit issaannannguaq aalajangerneqarpoq.
Nunaqarfimmi aqutsisut siulersuisuini siulittaasoq, Anda Martinsen Radioaviisimut oqarpoq atuarfiup sumut atorneqarallarsinnaanissaa pillugu innuttaasut tusarniaaffigineqarsimasut.
-Atuarfiup sumut atorneqarnissaani aalajangiisoqalerpat isumaqarpunga inuusuttut maani najugallit arlaqartut eqqarsaatigineqartariaqartut. Inuusuttut sammisassaqanngillat, takorloorneqarsinnaavorlu internetcafe-liortoqarnissaa, Anda Martinsen oqarpoq.
Kapisilinni atuartut pingasut immikkut atuartinneqartanissaat isumaqatigiissutigineqareerpoq ilinniartitsisumillu tikittoqartarnissaa aaqqinneqareerluni. Massakkullu tullinnguuppoq atuarfiup matoqqagallarnerani sumut atorneqarluarsinnaassanersoq tusarniaassutigissallugu.
Tallimanngormat nalunaaqutaq ulloqeqqanut killeqartumik innuttaasunut tusarniaasoqarpoq.
Apersuineq
Taamaakkaluartoq atuarfik sumut atorneqarsinnaanersoq suli aalajangiiffigineqassanngikkallartoq, Nunaqarfimmi aqutsisut siulittaasuat, Anda Martinsen oqarpoq.
Innuttaasut maanna tusarniaaffigineqareerput aggustillu 22-ani suliamut attuumassuteqartut kapisillinukartussaassapput taamanikkussamullu nalorninaallissaaq Kapisilinni atuarfik sumut atorneqarsinnaassanersoq.
Kapisillinni innuttaasut 90-t missaanniipput.
