Kapisilinni atuarfik matulerpoq
Nuup nunaqarfiisa ilaanni Kapisilinni atuarfik matulerpoq.
- Ukiumi atuarfiusumi 2006-2007-imi atuartoq ataasiinnaasussaagunarmat, atualeqqaartussaqanngimallu, angajoqqaat nunaqarfimmilu aqutsisut paaseqatigalugit Kapisillit atuarfiata matunissaa aalajangiupparput, Nuup Kommuneani kulturimut ataatsimiititaliap siulittaasua, Maliinannguaq Marcussen Mølgaard AG-mut ullumi saqqummersumut oqarpoq.
- Atuartumut ataasiinnarmut ilinniartitsisup atuarfimmi uninngatinniarneqarnera ajornannguatsiarmat, aalajangerparput atuarfik aggustip aallaqqaataani matuneqassasoq, Maliinannguaq Marcussen Mølgaard oqarpoq.
Atuartoq kiserngoruttoq angajoqqaaminit atuartinneqassaaq Nuummi ilinniartitsisoq ingerlaavartumik ilitsersuisoralugu. Ilaanneeriarluni atuartoq taanna Nuummi atuaqataasarnissamut periarfissinneqartassaaq, angajoqqaavilu nunaqarfimmiittut ilinniartitsisumit tikeraarneqartassallutik, atuartitsinerlu qarasaasiakkut ungasissumit atuartitsinertut ingerlanneqartassallunissaaq. Taamatut atuartitseriaaseq kujataani savaatilinni atorneqartarpoq.
