Kapisilinni atualeqqaartoq ataasiuvoq

Atualeqqaartitsisup Jørgine Mikkelsenip pania Frederikke ullumi atualerpoq. Kapisilinni atuarfiup ammaqqinnera ilaqutariinnut nuannaarutaavoq:

- Ajunngilaq perrooqaaq, peroornermik. Nuanneqaaq. Eqqissiallannaqaaq aamma, meeqqat ullaarnaniit asuli angalaarunnaarlutik atualermata. Qujanassaqaaq assut, Jørgine Mikkelsen nassuiaavoq.

Kapisillit atuarfianni ullaaq qulinut atualeqqaartitsinermi Nuumminnaanniit tikittoq tikilluaqqusisuuvoq kingornalu atuarfiup pisortartaava Karl Lundblad aamma tikilluaqqusilluni.

- Sivitsunngitsoq naammassivoq. Atualersoq tanngassimaarnermik iluamilluunnit qiviarneq saperpoq. Qungujulanermik inequnaqaaq. Kalaallisoorami tulluarinermillu, anaanaa tulluusimaaqisoq oqarpoq.

Ilaqutariit namminerminni ullup sinnerani kaffisortitsissapput, tamulugassartalimmik. Taava unnukkut aamma ilaqutariittut katerisimaaqqissallutik.

Nuup illoqarfiani atuarfinni tallimaasuni atualerlaat 191-upput, klassit qulingiliuat aallartissallutik, Qeqertarsuatsiaani pingasut atualeqqaarput Kapisilinnilu ataaseq.