Kapisilinni anorersuaq aseruingaatsiarpoq
Kapisilinni ippassaani anorersuarujussuarpoq, aatsaallu taama anorlertigisoq, Kapisilinni nunaqarfiup aqutsisuini siulittaasup, Andreas Martinsenip, oqaatigaa.
- Unnuaqqutsigami anorersuaq ila sakkortoqaaq! Angallatit ukiumi atorneqanngitsut pituffinnut pitoqqasut kitsaminnik qangattartoorlutik aallarsimagunaramik tippullutillu, aqaguani takuagut tamaavimmik piuneerutiivillutik seqummakut, Andreas Martinsen oqaluttuarpoq.
Taanna nangilluni oqaluttuarpoq, Kapisilinni umiatsiallit qulit missaanniittut akornanni sisamat umiatsiaat atorsinnaajunnaavillutik sequmissimasut, aammalu saavittoqarsimalluni.
- Anorersuaveqigami, qarasaasiami takuarput minutsimut 56 meeteri angusarlugu sukkassuseqarsimasoq. Meeraallutali anorersuarpassuit misigisarpavut, aatsaat taama sakkortutigisumik misigisaqarpugut, anorit arlariiusarsuugamik aappaa kitaatungitsigut aappaa kangiatigut, Andreas Martinsen oqarpoq.
Andreas Martinsen aamma oqaluttuarpoq illu aasarsiortarfik ataaseq atorsinnaajunnaarluni aserorsimasoq, aalisakkanullu panersiivissuit saviminernik qisunnillu sanaat atorsinnaajunnaarlutik uppikaallutik aserorsimasut, illullu ilaasa qaliaasa pappialarsuartaat teqqaasimallutik.
