Kapisilik 7500 koruuninnassutigivaa
Akissarsiassaq kapisillit nalunaaqutaannik nassiussisimasut tamarmiusut akornanni makitsinikkut tunniunneqartarpoq. Kattuffik, NASCO, ukiut tamaasa akissarsisitsisartuuvoq.
Gerth Jack Storer NASCO-miit check-imik 1500 dollarinik nalilimmik, imaluunniit 7500 koruunit missaannik pissarsivoq. Kapisilinnut nalunaaqutsiussaq kapisilimmit Canadami, 2007-imi Miramchip kuussuata kujammut kitaani nalunaaqutsiunneqarsimasumeersuuvoq.
- Kapisilimmik nalunaaqutserneqarsimasumik aatsaat pisaqarpunga, qanorlu iliornissara aallaqqaammut ilisimanngilara. Namminersornerullutik Oqartussanut sianerpunga, Pinngortitaleriffimmullu saaffiginninnissara paasillugu, Gerth Jack Storer radioaviisimut oqarpoq.
Kapisilik Nuup kujatinnguani pisarineqarpoq.
NASCO (North Atlantic Salmon Conservation Organisation) kattuffiuvoq Atlantikup Avannaani kapisilinnik nujuartanik piujuaannartitsinissamik kissaateqartoq. NASCO-mit kapisilinnik nalunaaqutsersuisarnermik pilersaarut ingerlanneqarpoq kapisillit nalunaaqutaannik utertitsinissamut kaammattuiniarluni pitsanngorsaaniarlunilu.
Kapisillit nalunaaqutserneqartarput kapisillit qanoq siaruartigisimanerat ingerlaartarnerallu pitsaanerusumik ilisimasaqarfigilerumallugit.
Kapisilinnik nalunaaqutsersuinermik suliniummut atatillugu 1500 dollarinik ukiut tamaasa akissarsisitsisoqartarpoq NASCO-mi nunat immikkoortuinut ataatsimiititaliaanni tamani makkunaaniittuni; Amerikap avannaani, Atlantip Avannamut Kangiani aamma Kalaallit Nunaata Kitaani. Ajugaasut NASCO-mi ukiumoortumik ataatsimeersuarnermi nalunaarutigineqartarput.
Kapisilinnut nalunaaqutsiussat Kalaallit Nunaanni Pinngortitaleriffimmut nassiunneqartarput.
