KANUNUPE: Nunaqarfiit akisussaaffeqarnerulissapput

Siornatigut kiserliortutut misigisimasarneq aningaasaliissutaasartunut aamma siunissami akisussaassuseqarnerulernermik kinguneqassasoq, Nunaqarfiit Peqatiiffiata KANUNUPE-p siulittaasua oqarpoq. Jens Kristian Therkelsen, Qaasuitsup Kommuniata nunaqarfiisa 32-iusut ilaanni aamma Ikerasanni nunaqarfinni aqutsisuni ilaasortaasoq isumalluarpoq.

- Kommuneqarfiit allat eqqarsaatigalugit malunnarpoq, annertunerusunik akisussaaffeqalersimagut. Assersuutigalugu Kommune Kujallermi ukioq kingulleq nunaqarfimmiut isumasiorneqarsimapput, kommunerujussuanngornerup kingorna qinigaaffiusumi nutaami qanoq ittumik aqutseriaaseqartoqassanersoq eqqarsaatigalugu, Jens Kristian Therkelsen oqarpoq.

Aamma Kommuneqarfik Sermersooq aamma Qeqqata Kommunia pitsaasumik suliniuteqarniartut KANUNUPE-mit tusarneqarsimavoq.

- Ataatsimut isigalugu neriuppunga nunaqarfimmi aqutsisut atulersussat tamarmik oqartussaaffimmik annerusumik tigummiaqalerumaartut, siulittaasoq oqarpoq.

Siornatigut nunaqarfiit aqutsisui ataasiakkaarlugit kommunalbestyrelsemut saqqummiussisarput, taamaakkaangallu tunuliaquttat killeqarsinnaasarput.

- Kisianni nunaqarfiit amerlanerpaartaat maanna kattuttussanngorput, taamaalillutillu amerlanerusunik tunuliaqutaqarlutik saqqummiussisinnaanngussapput, tamanilu nukittoqutaalluarsinnaasoq, Jens Kristian Therkelsen oqarpoq.

Kalaallit Nunaanni Nunaqarfiit Peqatigiiffiat KANUNUPE Kalaallit Nunaanni Kommuneqarfiit Kattuffiat KANUKOKA ukiumoortumik maajimi ataatsimiilerpat aamma ataatsimeersuassaaq.

Nunaqarfinni aqutsisussanik marlunngorpat apriilip ulluisa 28-anni qinersisoqassaaq.