Kanukokap siulittaasua: Kommunit ersarissumik oqariartuuteqarput

Kommunit ersarissumik oqariartuuteqarput, Kanukoka-mi siulittaasuugallartoq Karl Lyberth Kanukokap ataatsimeersuarnerata kingorna oqarpoq. Oqariartuutaalli ersarinnerusinnaagaluarput, kommunimmi kattussuunneqarnissaanut isummat assigiinngitsut ikinnerpaamik pingasut erserput. Karl Lyberthip ataatsimeersuarneq ima nalilerpaa:

-Kanukokamit aallartitat oqarput nutarterineq, aaqqissuusseqqinneq akueralugu, taannalu tunaartaralugu sulisoqassasoq. Qulaajagassat assigiinngitsut aamma qulaajaqquaat, ilaat piffissaliunneqartoq sivikigaat, kissaatigalugulu piffissaliussaq sivitsorneqassasoq, Karl Lyberth oqarpoq.

Ataatsimiititaliaq politikkikkut pilersinneqarsimavoq sulisullu akornanni ataatsimiititaliaq Kanukokap ataaniittoq aamma pilersinneqarsimalluni. Ataatsimiititaliani pilersinneqartuni apeqqutit misissorneqassapput nalilersorneqarlutillu.

-Nalunngilara aamma naalakkersuisut suleqatigiissitamik pilersitsiniartut apeqqutit tamakku qulaajarnissaat siunertaralugu, Karl Lyberth oqarpoq.

Karl Lyberth-ip kissaatigaa kommunit imminnut nassaariniarumaartut qularinngilaalu aamma imminnut nassaariumaartut, tamangajammik imminnut nassaarereeramik.