Kanukokap nittartagartaarnissani utaqqivaa

Kalaallit Nunaanni Kommunit Kattuffiata nittartagaa kanukoka.gl matugallarneqarpoq.
decembarip 22-at 2009 07:28

Kattuffiup tusagassiuutinut allagaa malillugu nittartagaq nutaanngorsimalluni ukiortaami saqqummeqqissasoq atuarneqarsinnaavoq.

Kanukoka-p nittartagaata teknikkikkut atortorissaarutai qanganitsersimapput, suliariuminaassisimallutillu. Taamaammat Kanukokap suliassartai kingulliit naammassiumallugit nittartagaq matugallartariaqarsimavoq.

Nittartagaq nutaamik isikkoqalissaaq, taamaattoq www.kanukoka.gl -ip sananeqaataa, siornatigut, tassa 2002-mi, danskit atuagassiaani "Bedst på nettet"-imi nersornaasigaasimasoq attatiinnarniarneqassalluni.

Nittartakkap kommuunit sulisuinit, kiisalu politikerinit, paasiuminartunngorlugu ilusilersorneqarsimanera nersornaasigaasimaneranut pissutaatinneqarpoq.

Nittartakkamullu isertartut namminersortoqarfimmiit allanillu inuiannut tunngassutilinnik paasisassarsiortunik amerliartuinnartunit iserfigineqartalersimasoq, kanukoka allappoq, kanukokamiullu neriuutigaat matusigallarneq atuisartunut akornutaavallaassanngitsoq.