Kanukokap ilusissaa borgmesterit isumalluarfigaat
Inernerillu ataatsimut isigalugit naammagisimaaraluarlugit, taamaattoq Kommuneqarfik Sermersuumi borgmesteri Asii Chemnitz Narup ima oqarpoq:
- Kommuneqarfik Sermersuup kommunalbestyrelsiani amerlanerussuteqartuni takorloorsimagaluarparput suli nutartererpalaarnerusumik ilusiliisoqarsimasinnaanissaa. Tamanna kissaatigisimagaluaqaarput, taamaattorli ataqqivara politikkikkut sulinermi aamma isumaqatiginninniarnerit aqqutigalugit inerniliisoqartarmat. Isummat sapinngisamik amerlasuut katersorneqarnissaat nammineq uanga pingaartippara. Naaperiaanerit assiginngitsut aqqutigalugit ilusiliinerit tusaatissatut tiguakka, Asii Chemnitz Narup oqarpoq.
Siulersuisunngortut kattuffimmi aningaasatigullu ingerlatsinermi 10-20 procentit akornanni ukiuni qaninnerni annikillisaassapput, minnerpaamillu 10 procentinik sipaarniartoqartariaqartoq, Asii Chemnitz Narup Kommuneqarfik Sermersooq sinnerlugu oqarpoq, ingerlaannarli sipaarniutissatut siunniunneqartut pakatsinartuunerarpai, annikippallaarnerarlugit.
Kommune Kujallermi borgmesteri Simon Simonsen aaqqissuusseqqinnissaq pillugu aamma isumalluarpoq, sipaarniutissatullu anguniakkat qinigaaffiup massuma iluani piviusunngortinneqarsinnaanissaat aamma neriuutigalugu.
Aallartitat ukiumoortumik ataatsimiittarunnaarlutik, maanna ukiut sisamakkuutaarlugit ataatsimiittalissapput. Aallartitalli ukiut marlukkuutaarlugit ataatsimiittarnissaat Qaasuitsup Kommunianit ujartorneqaraluarpoq, suliat killiffiisa nalilersorneqarsinnaanissaat ilaatigut tunngavilersuutigineqarluni.
Tamanna pissusissamisuuunnginnerami?
Simon Simonsen ima akivoq:
- Soorunami taama oqartoqarsinnaagaluarpoq, kisianni politikkikkut ataatsimiititaliat pilersiortorniarneqarput, suliat assigiinngitsut tassuunatigut aaqqinniarneqarlutik, suliat pilersaarutaasut siunniussallu isumaginiarneqarlutik, Simon Simonsen oqarpoq, nangillunilu:
- Naatsorsuutigilluinnarpara siulersuisunngortut borgmesterit uagut peqatigaluta, qanimut suleqatigiilluta kommuninit anguniarneqartut qulakkeertassagivut, Simon Simonsen oqarpoq.
Kanukokap nutaamik aaqqissuunneqarnissaa pillugu immikkut ittumik ataatsimeereernerup kingorna Kommune Kujallermi borgmesteri Simon Simonsen taama oqarpoq.
