Kanukokami sipaarniutissatut siunnersuutit amerlaqaat
- Aningaasartuutit millisartariaqarpavut, Evelyn Frederiksen, Qeqqata kommunia sinnerlugu Kanukokamut aallartitaq oqarpoq, Kanukokamilu siulittaasoq piffissap ilaannaa atuutissinnaasoq assersuutigalugu.
- Ataatsimoorussamik tapiissutit 30 millioni koruuninik appartinneqarnerisigut kommunit sipaarniartariaqalernikuupput, taamaattumik aamma aningaasartuutit millisartariaqarpagut, Evelyn Frederiksen, Qeqqata kommunia sinnerlugu Kanukokamut aallartitaq oqarpoq, nassuiaallunilu Kommunit kattussuunneqarnerini aningaasartuutikillisaaneq ingerlanneqarmat, tamannalu Kanukokami aningaasartuutikillisaanissamik aamma kinguneqassasoq.
Qeqqata kommuniata siunnersuutaat politikkikkut allaffissornikkullu sipaarniarnermik kinguneqarsinnaasoq, Evelyn Frederiksen isumaqarpoq, soorlu siulittaasuuffik sipaarniarfigineqarsinnaalluni.
- Periarfissat ammatipparput imatut, tamarmik sipaarniarfigineqarsinnaasut. Allaffissornikkut immikkut ilisimasalinnik attartortarnertigut taavalu siulittaasup, aaqqissuussaanerup allanngortiterneratigut piffissaq tamaat atuutinngitsumik siulittaasoqarnissaq, Evelyn Frederiksen assersuuteqarluni oqarpoq.
Kanukokap politikikkut allaffissornikkullu aaqqissuuteqqinnissaanut atatillugu kommunit assigiinngitsunik siunnersuuteqarput, assersuutigalugu Kommune Kujallermiit politikkikkut allannguutissamik siunnersuuteqartoqarpoq, tassa siulersuisut borgmesterinit sisamaasunik inuttalerneqassasut kiisalu siulittaasuuffik borgmesterit paarlakaallutik tigummisassagaat. Allaffissorneq eqqarsaatigalugu, Kommuneqarfik Sermersuumit Kanukokap kommuninut sullissisutut inissisimanerata naliliiffigineqqinnissaa siunnersuutigineqarpoq, tassa Kanukokap siunissami susassaqarfinnik tulleriinnerilersuisarnissaa kiffartuussinerullu qaffasissusissaa allaaserineqassasoq piumasarineqarluni.
Kommunit Kanukokap aaqqissuussaanerata allannguutissaanut siunnersuutaat aallartitat ullumi oqaluuseraat, oqaluuserisallu inerneri ataatsimiinnermi aqagu saqqummiunneqassapput.
