KANUKOKA taarsiiffigitissaaq
Eqqartuussinerup inernera nuannaarutigissallugu KANUKOKA pissutissaqarpoq.
2006-imi Kimik A/S 8 miliuunit koruunit missaannik KANUKOKA-mut taarsiisussanngorlugu eqqartuunneqarpoq. Taamatut akiliisussanngortitsineq Kimik A/S-imit Østre Landsretimut ingerlateqqinneqarpoq, taamatullu ingerlatitseqqinnerup taarsigassanik amerlanerusunik akiliisussanngortitaaneq ullumikkut kinguneraa. Tassami ullumi eqqartuussinerup kinguneranik qarasaasialeriffiup KANUKOKA-mut taarsigassai 10 miliuunit koruuniussapput, taakkualu saniatigut 1,4 miliuunit koruunit eqqartuussissuserisunut akiligassat ilanngullugit akiligassiissutigineqarlutik.
Naatsumik oqaatigalugu suliassaq pineqartoq 1997-imi KANUKOKA-mi aalajangiinermik tunngaveqarpoq, akileraartarnermut tunngasut patsisigalugit kommunit qarasaasialeriffiata namminersortunngortinnissaa kissaatigineqarmat, tassa Kimik A/S-inngorlugu. IT-mut immikkoortortami sulisut pigiinnarumallugit qarasaasialeriffimmi sulisut piginneqataasinnaanerat ammaanneqarpoq, taamaattorli piginneqataasunit aningaasaliisunit KANUKOKA annersaalluni.
Taamaattorli Kimik A/S pilersinneqareermat sulisut isumartik allanngortippaat suliffeqarfiullu KANUKOKA ilaatinnagu ingerlaqqinnissaa aalajangiunneqarluni.
Taamatut aalajangiineq ullumi eqqartuussinermi Østre Landsretimit “pissusissamisuunngilluinnartutut” taaneqarpoq, soorluttaaq Østre Landsretimit KANUKOKA ilumoornerarneqartoq, oqaatigineqarmat Kimik A/S-imit Kalaallit Nunaanni kommunit qarasaasiatigut inissisimanerat ajorseriartinneqartoq, kommunit qarasaasiamik ingerlatsinerannik ilisimasat tamaasa qimarngukkamikkik, taamalu kommunit Kimik A/S-imik atuisariaqalersillugit, KANUKOKAp qarasaasialeriffimmik nutaamik pilersitsinissaata tungaanut.
Tassa tamatumunnga tunngatillugu aningaasartuutit 10 miliuunit koruuniusut KANUKOKA-mut utertinneqartariaqartut Østre Landsret aalajangiivoq.
IT-mik ingerlatsiviup ajutoornera nunatsinni kommunit aaqqiagiinnginnerujussuannik kinguneqarpoq, tassami kommunini atorfikkaat arlallit Kimik A/S-imi piginneqataammata, Kimik A/S-illu suleqatigineqarnerata nanginneqarnissaa kissaatigimmassuk. Qarasaasialeriffiup kommunit arlallit ullormanna tikillugu sullitarai, naak kommunit sinnerisa qarasaasialeriffik Sermit A/S KANUKOKA-mit Namminersornerullutillu Oqartussanit ataatsimoorullugu pigineqartoq atugarigaluaraat.
Kimik A/S-ip pisortaata Ian Wennerfeldt-ip Østre Landsretimi ullumi eqqartuussineq annilaarutigeqaa.
Taanna Radioaviisimut oqarpoq, eqqartuussinerup kinguneranik suliffeqarfiup piginneqataasullu arlallit akiliisinnaajunnaarnerat kingunerisinnaagaa. Taamaattorli ikioqatigiinnikkut KANUKOKA-mik aaqqissuussamik suleqateqartoqarsinnaanera neriuutiginerarpaa, taamaalilluni ingerlaqqittoqarsinnaaniassammat.